նախընտրելի դարձնել
ԱՄՆ Թենեսի նահանգում մահաբեր ներարկմամբ ձախողված մահապատիժ վերապրած 50-ամյա Քրիստա Փայքը դուրս է գրվել հիվանդանոցից և վերադարձվել բանտ։ Այդ մասին շաբաթ օրը՝ հոկտեմբերի 10-ին, հայտնել են նրա փաստաբանները, տեղեկացնում է CBS News-ը։
Փայքին կրկին տեղափոխել են Նեշվիլի Դեբորա Ք. Ջոնսոնի անվան վերականգնողական կենտրոն, որտեղ նա պահվել է ավելի քան 30 տարի։ Պաշտպանների վկայությամբ, դատապարտյալը շարունակում է բժշկական օգնություն ստանալ բանտում, իսկ փաստաբանները հետևում են նրա վերականգնմանը։
«Քրիստան շնորհակալ է արտակարգ ծառայությունների աշխատակիցներին և բժշկական թիմին այս արտակարգ հանգամանքներում ցուցաբերած օգնության համար», — ասվում է փաստաբանների հայտարարության մեջ։
Սեպտեմբերի 30-ին Փայքին պետք է մահապատժի ենթարկեին մահաբեր ներարկմամբ։ Նրան ներարկել են դեղամիջոցի երկու դեղաչափ, սակայն դա չի հանգեցրել դատապարտյալի մահվանը։ Դրանից անմիջապես հետո փաստաբանները հաստատել են, որ նա ողջ է և գտնվում է հիվանդանոցում։ Մահապատժին ներկա գտնված ԶԼՄ-ների ներկայացուցիչներից մեկը հայտնել էր, որ ընթացակարգի սկսվելուց մոտ մեկ ժամ անց լսվել է, թե ինչպես է Փայքը բարձր խռմփացնում։ Այնուհետև նրան շտապօգնությամբ տեղափոխել են հիվանդանոց։
Երեքշաբթի օրը փաստաբանները հայտնել են, որ կինը գիտակցության է եկել և խոսել է՝ գտնվելով հիվանդասենյակում։ Հաջորդ օրը նա օգնությամբ սկսել է առաջին քայլերն անել։ Պաշտպանները տեղեկացրել են, որ հինգշաբթի արդեն Փայքը կարողանում էր քայլել որոշակի աջակցությամբ։ Նրա ձեռքերը ապաքինվում էին, դրանց շարժունակությունն ու ուժը վերադառնում էին։ Փաստաբանները նաև հայտնել են, որ դատապարտյալի թոքերի վիճակը բարելավվել է, և նա սկսել է սովորական սնունդ ընդունել։
Մահապատժի վերաբերյալ տեղեկատվական կենտրոնի տվյալներով, Փայքը ԱՄՆ-ում մահապատժի փորձը վերապրած միակ հայտնի դատապարտյալն է։ Ընդ որում, նա շարունակում է մնալ երկրում մահապատժի կիրառման ժամանակակից պատմության մեջ միակ հայտնի մարդը, որը ողջ է մնացել մահաբեր դեղամիջոցների փաստացի ներարկումից հետո։
1995 թվականին Փայքը մեղավոր է ճանաչվել իր 19-ամյա համակուրսեցի Քոլին Սլեմմերի դաժան սպանության համար։ Դատական նյութերի համաձայն, հանցագործության պահին Փայքը 18 տարեկան էր։ Նա իր ընկերոջ և մեկ ծանոթի հետ խոշտանգել ու սպանել է աղջկան Թենեսիի համալսարանի տարածքի անտառապատ հատվածում։ Հարձակումը, որի ընթացքում օգտագործվել են մսագործի կացին և գրասենյակային դանակ, գործի նյութերի համաձայն, տևել է մինչև մեկ ժամ։
Մահապատժի իրականացումը թույլատրվել է այն բանից հետո, երբ ԱՄՆ Գերագույն դատարանը մերժել է այն կասեցնելու փաստաբանների վերջին փորձը։ Փայքը պետք է դառնար առաջին կինը, որին Թենեսիում մահապատժի էին ենթարկելու 1820 թվականից ի վեր։
Առայժմ պարզ չէ, թե ինչ կլինի նրա գործի հետ հետո։ Չորեքշաբթի օրը փաստաբանները հասել են դատական որոշման, որը պարտավորեցնում է Թենեսիի ուղղիչ հիմնարկների դեպարտամենտին պահպանել ձախողված մահապատժի հետ կապված փաստաթղթերն ու այլ ապացույցները։
Պաշտպանները նաև կրկին կոչ են արել նահանգապետ Բիլ Լիին մահապատիժը փոխարինել ցմահ ազատազրկմամբ՝ առանց պայմանական վաղաժամկետ ազատման իրավունքի։ Նրանց կարծիքով, դա կբացառեր մահապատժի կրկնակի փորձի հնարավորությունը։ Փաստաբան Լյուկ Ինենը դատարանում հայտարարել է, որ նահանգի իշխանությունները ոչ մի երաշխիք չեն տվել, որ Փայքին կրկին չեն փորձի մահապատժի ենթարկել։
