Ուկրաինան պատրաստ է դադարեցնել ռուսաստանյան նավթավերամշակման գործարաններին (ՆՎԳ) հասցվող հարվածները, եթե Ռուսաստանը դադարեցնի ուկրաինական էներգետիկ ենթակառուցվածքի վրա հարձակումները։ Այս մասին իր Telegram-ալիքում հայտարարել է Ուկրաինայի նախագահ Վլադիմիր Զելենսկին՝ ընդգծելով, որ լարվածության թուլացման ուղղությամբ ցանկացած քայլ պետք է լինի փոխադարձ և ուղեկցվի իրական երաշխիքներով։

Ըստ Զելենսկու, Ռուսաստանը շարունակում է հարվածներ հասցնել Ուկրաինայի քաղաքացիական օբյեկտներին, բնակելի տներին և էներգետիկ ենթակառուցվածքին։ Առավոտյան ռուսաստանյան զորքերը հարվածել են Դոնեցկի մարզի Սլավյանսկ քաղաքի հինգհարկանի շենքին. մուտքերից մեկը ամբողջությամբ ավերվել է, փլատակների տակ կարող են մարդիկ լինել։

Նախօրեին ռուսաստանյան ուժերը հարվածել էին Խարկովի բժշկական հաստատությանը, ինչպես նաև հարձակվել քաղաքացիական ենթակառուցվածքի և բնակելի տների վրա։ Զապորոժիեում ավարտվել են ռուսաստանյան հարվածից հետո որոնողափրկարարական աշխատանքները, որի հետևանքով զոհվել է 23 մարդ, այդ թվում՝ չորս երեխա։

Զելենսկին նաև հայտնել է, որ վերջին շաբաթվա ընթացքում Ռուսաստանը Ուկրաինայի դեմ կիրառել են մոտ 1450 կառավարվող ավիացիոն ռումբ, տարբեր տիպի 75 հրթիռ և ավելի քան 1640 հարվածային անօդաչու թռչող սարք։ Նրա տվյալներով, անօդաչուների մոտ 60%-ը եղել են ռեակտիվ։

Ուկրաինայի նախագահը շնորհակալություն է հայտնել արտակարգ ծառայությունների աշխատակիցներին, որոնք օգնում են տուժածներին և վերացնում ռուսաստանյան հարձակումների հետևանքները։

Զելենսկին հայտնել է, որ Ուկրաինան կշարունակի համակարգումը միջազգային գործընկերների, այդ թվում՝ եվրոպական առաջնորդների հետ։ Կիևը աշխատում է լրացուցիչ ռազմական օգնության փաթեթներ ստանալու ուղղությամբ՝ առաջին հերթին հակաօդային պաշտպանության միջոցների և մարտական ավիացիայի համար նախատեսված զինամթերքի մասով։

Ուկրաինայի նախագահի կարծիքով, Եվրոպայում պատերազմի պատասխանատվությունը կրում է Ռուսաստանը։ Նա հայտարարել է, որ Մոսկվան արդեն հիմա կարող էր դադարեցնել էներգետիկ ենթակառուցվածքի վրա հարվածները, սակայն Ռուսաստանի առաջնորդ Վլադիմիր Պուտինը նման քայլի պատրաստակամություն չի ցուցաբերում։

Զելենսկին ընդգծել է, որ հարձակումների ինտենսիվության նվազեցման վերաբերյալ ցանկացած պայմանավորվածություն պետք է նախատեսի կողմերի փոխադարձ պարտավորություններ և դրանց պահպանման իրական երաշխիքներ։