Սերբիայի Ժողովրդական ժողովի նորընտիր նախագահ և երկրի նախագահի պարտականությունները կատարող Ալեքսանդր Չուպիչը չի մասնակցի Արևմտյան Բալկանների գագաթնաժողովին, որը տեղի կունենա հաջորդ շաբաթ Բրյուսելում։ Այս մասին հայտնել է Սերբիայում Եվրոպական միության պատվիրակությունը, տեղեկացնում է N 1-ը։
ԵՄ պատվիրակության գործերի ժամանակավոր հավատարմատար Յուլիան Վասալոյի հետ հանդիպման ժամանակ Չուպիչը ափսոսանք է հայտնել, որ չի կարողանա ներկա գտնվել գագաթնաժողովին։ Միաժամանակ նա ընդգծել է, որ Սերբիայի նոր ղեկավարությունը մեծ նշանակություն է տալիս Եվրամիության հետ համագործակցությանը, իսկ ԵՄ-ի հետ հարաբերություններն ու առանցքային բարեփոխումների առաջմղումը շարունակում են մնալ Բելգրադի կարևորագույն առաջնահերթությունների թվում։
Հանդիպումը կայացել է նախօրեին՝ Եվրամիության նստավայրում, Չուպիչի պաշտոնավարման առաջին լիարժեք օրը։ Դրան մասնակցել են նաև Ուսանողական շարժման ներկայացուցիչները։
Կողմերը քննարկել են Սերբիայի եվրոպական ուղին և ԵՄ-ին երկրի անդամակցության գործընթացի հետագա քայլերը՝ հատուկ ուշադրություն դարձնելով անհրաժեշտ բարեփոխումների իրականացման գործում խորհրդարանի դերին։
Քննարկվել են նաև իրավունքի գերակայության հարցերն ու բանակցային 23-րդ և 24-րդ գլուխները, որոնք վերաբերում են դատական համակարգին, հիմնարար իրավունքներին, արդարադատությանը, ազատությանը և անվտանգությանը։
Հանդիպման մասնակիցներն ընդգծել են ժողովրդավարական ինստիտուտների ամրապնդման, դատական համակարգի անկախության պահպանման, լրատվամիջոցների ազատության ոլորտում իրավիճակի բարելավման և եվրոպական ինտեգրման գործընթացի վերաբերյալ քաղաքացիների իրազեկվածության բարձրացման անհրաժեշտությունը։
Կողմերը նաև պայմանավորվել են լրացուցիչ տեխնիկական խորհրդակցություններ անցկացնել կրթության, էներգետիկայի և շրջակա միջավայրի պահպանության հարցերի շուրջ։
Եվրամիությունը վերահաստատել է իր հանձնառությունն ընդլայնման քաղաքականությանը և ԵՄ-ին անդամակցության ճանապարհին Սերբիային աջակցելու պատրաստակամությունը։ Միաժամանակ միության ներկայացուցիչներն ընդգծել են, որ անդամակցության բանակցություններում հետագա առաջընթացը պահանջում է բարեփոխումների շարունակություն։ Հանդիպման մասնակիցները պատրաստակամություն են հայտնել շարունակել երկխոսությունը և նոր թափ հաղորդել վերափոխումներին, որոնք պետք է Սերբիայի քաղաքացիների համար շոշափելի արդյունքներ ապահովեն։





























