նախընտրելի դարձնել
Շվեյցարիան վերսկսել է Հյուսիսային Կորեայում իր դիվանագիտական գրասենյակի աշխատանքը և առաջարկել աջակցել Փհենյանի ու Սեուլի միջև երկխոսության վերականգնմանը՝ Կորեական թերակղզում լարվածության աճի ֆոնին, հաղորդում է Euronews-ը։
Շվեյցարիայի արտաքին գործերի նախարար Ինյացիո Կասիսը հոկտեմբերի 29–30-ը այցելել է Փհենյան։ Նա դարձել է 2003 թվականից ի վեր ԿԺԴՀ այցելած Շվեյցարիայի արտաքին քաղաքական գերատեսչության առաջին ղեկավարը։ Այնուհետև նախարարը մեկնել է Սեուլ։
Շվեյցարիայի ԱԳՆ-ի տվյալներով, Փհենյանի գրասենյակը վերսկսել է աշխատանքը հոկտեմբերի 19-ին։ Այն ենթարկվում է Պեկինում Շվեյցարիայի դեսպանությանը, որը պատասխանատու է Հյուսիսային Կորեայի հետ դիվանագիտական և հյուպատոսական հարաբերությունների համար։ Նախկին գրասենյակը զբաղվում էր մարդասիրական համագործակցությամբ և փակվել էր 2020 թվականին՝ COVID-19 համավարակի պատճառով։ Երկրների միջև քաղաքական խորհրդակցությունները դադարել էին 2019 թվականին։
Փհենյանում Կասիսը հանդիպել է Հյուսիսային Կորեայի ԱԳՆ ղեկավար Չհվե Սոն Հիի և իշխող Աշխատավորական կուսակցության ղեկավարության ներկայացուցչի հետ։ Կողմերը քննարկել են քաղաքական երկխոսության վերականգնման և անվտանգության հարցերը։ Կասիսը հայտարարել է, որ առաջարկել է Շվեյցարիայի աջակցությունը լարվածության նվազեցման գործում, և որ նախաձեռնությունը, ըստ երևույթին, բարեհաճ ընդունելության է արժանացել։
Սեուլում հարավկորեացի ներկայացուցիչները հույս են հայտնել, որ շվեյցարական գրասենյակը կօգնի կապեր հաստատել Փհենյանի հետ։
Այցը տեղի է ունեցել այն բանից հետո, երբ Հյուսիսային Կորեան ծովի ուղղությամբ արձակել էր մոտ տասը փոքր հեռահարության բալիստիկ հրթիռ։ Շվեյցարիան մասնակցում է 1953 թվականին Կորեական պատերազմին վերջ դրած զինադադարի պահպանման դիտարկմանը՝ Զինադադարի վերահսկման չեզոք պետությունների հանձնաժողովի շրջանակում։
