նախընտրելի դարձնելՀանրապետությունում այս տարվա առաջին յոթ ամիսներին արձանագրվել է սննդային թունավորման` բոտուլիզմի 9 դեպք` 13 տուժածով, որից 2-ը` մահվան ելքով: Դեպքերն արձանագրվել են Լոռու, Արմավիրի, Կոտայքի, Տավուշի, Արարատի մարզերում եւ Երեւանում: Այս մասին NEWS.am-ի թղթակցի հետ զրույցում ասաց Հայաստանի առողջապահության նախարարության պետական հիգիենիկ հակամահաճարակային տեսչության սնուցման բաժնի պետ Մարգարիտա Բաբայանը։ Իսկ 2011թ արձանագրվել էր բոտուլիզմի 18 դեպք` 29 տուժածով, որոնցից 3-ը` մահվան ելքով: 2010թ էլ արձանագրվել էր 12 դեպք` 19 տուժածով, 3-ը` մահվան ելքով:
Մարգարիտա Բաբայանի փոխանցմամբ` թունավորումներն առաջացել են տնային պայմաններում պատրաստված կարմիր պղպեղի, վարունգի, լոլիկի մարինադի, լեչոյի, շուշանի, ծիծակի պահածոների օգտագործման հետեւանքով:
Բոտուլիզմից խուսափելու նպատակով ՀՀ առողջապահության նախարարությունը մեկ անգամ եւս զգուշացնում է. խուսափել տնային պայմաններում պատրաստված պահածոների օգտագործումից, տնային պայմաններում պատրաստված պահածոներն օգտագործելուց առաջ ենթարկել ջերմային մշակման` պահածոյի պարունակությունը եռացնելով 20-25 րոպե: «Մի գնեք տնային պայմաններում պատրաստված պահածոներ շուկայից կամ պատահական անհատներից, պահածոյացման համար օգտագործեք թթվեցման, չորացման եւ սառեցման եղանակները, առաջին ախտանշաններն ի հայտ գալուն պես անմիջապես դիմեք բժշկի»,- ասաց նա:
Իսկ հիվանդության ախտանշաններն են` ընդհանուր թուլություն, բերանի չորություն, սրտխառնոց, փսխում, որովայնի շրջանում ցավեր, գլխապտույտ, շնչահեղձություն, տեսողության խանգարում (աչքերի առջեւ մշուշ, ցանց), երկտեսություն, ձայնի փոփոխություն (խռպոտություն, ռնգախոսություն), կլման ակտի խանգարում:
Հիշեցնենք, որ բոտուլիզմը սննդային ծանր թունավորում է, որի հարուցիչը Clostridium botulinum-ն է: Հիվանդության հարուցիչը գտնվում է արտաքին միջավայրում` հողի մեջ սպորների ձեւով, որտեղից էլ անցնում է բանջարեղենի, կանաչեղենի վրա: Նշված հարուցչի աճի եւ զարգացման համար անհրաժեշտ են անօդ պայմաններ, որտեղ բազմանում են եւ արտադրում թույն: Նման պայմաններ ստեղծվում են կափարիչներով հերմետիկ փակված պահածոներում: Հարուցչի ոչնչացումը կատարվում է միայն հատուկ սարքերում` ավտոկլավներում բարձր ճնշման (1.5-2 մթնոլորտ) եւ ջերմության (1200-1300C) ազդեցության տակ, որոնք առկա են միայն պահածո արտադրող կազմակերպություններում, իսկ տնային պայմաններում հնարավոր չէ նման պայմաններ: Ի դեպ, բոտուլիզմով ախտահարված սննդամթերքը չի փոխում իր համը, հոտը, գույնը եւ տեսքը:
