նախընտրելի դարձնել
Վրաստանի վարչապետ Բիձինա Իվանիշվիլին, իր ամանորյա ուղերձում հայտարարել է երկրի նախկին պաշտոնայների նկատմամբ քրեական հետապնդումների գործընթացի դադարեցման մասին: Նա խոստացել է նաեւ «ներման նման ինչ-որ բան»:
«Գործընթացն ավարտված է: Բռնության եւ ստի համակարգը պարտված է, եւ հիմա մենք պետք է ներենք բոլոր նրանց, ովքեր կամա թե ակամա, բայց ներգրավված են եղել այդ համակարգում: Մենք պետք է ներենք նրանց, եւ ներման նման մի բան մտածենք»,-հայտարարել է Իվանիշվիլին` հունվարի մեկին վրացական հեռուստաընկերությունների եթերներով հեռարձակվող իր ամանորայ ուղերձում:
Հիշեցնենք, որ «Վրացական երազանք» կոալիցիան, Բիձինա Իվանիշվիլիի առաջնորդությամբ խորհրդարանական ընտրություններում հաղթանակ տանելուց եւ կառավարություն կազմելուց հետո, նախկին պաշտոնյաների եւ Սահակաշվիլիի նախկին իշխող կուսակցության` «Միացյալ ազգային շարժման» ներկայացուցիչների հանդեպ քրեական հետապնդում էր սկսել:
Վերջին 2 ամսվա ընթացքում կալանավորվել են պաշտպանության նախկին նախարարը, ՆԳՆ փոխնախարարը, ՆԳՆ նախկին աշխատակիցները, կրթության եւ գիտության նախարարը, Թբիլիսիի քաղաքապետն ու այլ գերատեսչություններ: Նրանցից շատերին ծառայողական լիազորությունները գերազանցելու մեղադրանք է ներկայացվել: Կալանավորվածների մի մասը դատարանի որաշմամբ ազատ են արձակվել: Սահակաշվիլին եւ «ՄԱՇ»-ի ներկայացուցիչները կատարվածը գնահատել են որպես հակառակորդների հանդեպ տարվող քաղաքական հետապնդում:
