նախընտրելի դարձնել
Աշխարհում նավթարդյունահանման ամբողջ աճը մինչեւ 2020թ. կստացվի ոչ ավանդական աղբյուրներից՝ ծանր նավթ, նավթակիր ավազներ, սլանցային նավթ եւ կենսավառելիք, իսկ 2020թ.-ից 2030 թվականն ընկած ժամանակահատվածում դրանք հանույթի 70% աճ կապահովեն, ասված է BP-ի հերթական զեկույցում:
Սլանցային բումն ԱՄՆ-ին թույլ կտա ընթացիկ տասնամյակում արդյունահանման ծավալով 1-ին տեղը գրավել եւ մինչեւ 2030թ. ինքն իր պահանջարկն ապահովել, ընդ որում՝ միայն սլանցային հանույթի մակարդակն ԱՄՆ-ում այդ ընթացքում կկազմի օրական հինգ մլն բարել նավթ, ինչը երկրին հնարավորություն կընձեռի ներկրել օգտագործվող նավթի 1 տոկոսը միայն՝ 2005թ. 30%-ի փոխարեն:
Սլանցային բումի պայմաններում ՕՊԵԿ-ի համար շատ դժվար կլինի, կանխատեսում է BP-ն: Եթե 2012թ. նոյեմբերին կարտելի նավթահանման չգործարկված հզորությունը կազմում էր օրական 2,5 միլիոն բարել, (ընկերությունները արդյունահանում էին մոտ 30 միլիոն բարել) WTI նավթի տարեկան միջին 94 դոլար/բարել եւ Brent 112,5 դոլար/բարել գների դեպքում, ապա 2015թ. դրանք կհասնեն օրական վեց միլիոն բարելի: Վերջին անգամ նման մակարդակ եղել էր 2002թ., երբ WTI –ն արժեր 21 դոլար/ բարել (Brent ՝ 25,02 դոլար/ բարել): Պահուստային հզորությունները թույլ կտան սահմանափակել նավթի գնաճը մատակարարումների ճգնաժամի դեպքում, սակայն դրանց առկայությունը չի նշանակում վերադարձ տասը տարի առաջվա գներին: Ըստ ВР-ի վերլուծաբանների կանխատեսման՝ 2020թ. մեկ բարելի միջին արժեքը կնվազի մինչեւ 80 դոլարի, գրում է «Վեդոմոստին»:
Այնուամենայնիվ, ըստ ВР-ի վերլուծաբանների, մինչեւ 2030թ. Ռուսաստանը եւ Սաուդյան Արաբիան կրկին նավթարդյունահանման առաջատարը կլինեն: Դա կապված կլինի սլանցային նավթի արտադրման աճի սպասվող դանդաղեցմամբ եւ գլոբալ պահանջարկի ավելացմամբ: BP-ն կանխատեսում է, որ մինչեւ 2020թ. նավթի համաշխարհային պահանջարկը կաճի տարեկան 2%-ով, իսկ 2020-2030թթ.՝ տարեկան 1,3%-ով:
Ըստ BP-ի գնահատման՝ առաջիկա տասնամյակում էլեկտրաէներգիայի նորացվող աղբյուրները կկազմեն համաշխարհային սպառման 7%-ից ոչ ավելին:
