Նախընտրելի
ԱՄՀ-ի նախկին ղեկավար Դոմինիկ Սթրոս Կանն իրեն բռնաբարության մեջ մեղադրող Նյու Յորքի հյուրանոցի սպասուհի Նաֆիսաթու Դիալոյին վճարել է 1,5 միլիոն դոլար:
Հիշեցնենք, 63-ամյա քաղաքական գործիչը եւ 33-ամյա սպասուհին համաձայնության էին եկել նախորդ տարվա դեկտեմբերին: Այն ժամանակ տեղեկություններ էին հայտնվել, որ գործարքի գումարը կազմել է 5 միլիոն դոլար: Ստացված գումարի 30%-ը Դիալոն կվճարի իր փաստաբաններին, հաղորդում են ֆրանսիական լրատվամիջոցները:
Ավելի վաղ New York Post թերթն արդեն սպասուհուն անհայտ գումար վճարել էր ` որպես փոխհատուցում նրա մասին վարկաբեկող տեղեկություն տարածելու համար, գրում է NEWSru.com-ը:
Դոմինիկ Սթրոս Կանը Նյու Յորքում ձերբակալվել էր 2011թ. մայիսի 14-ին` սեռական ոտնձգությունների վմասին Նաֆիսաթու Դիալոյի հայտարարության հիման վրա: Քրեական գործը փակվել էր օգոստոսի 23-ին, երբ պարզվել էր, որ սպասուհին ստել է: 2012թ. մայիսի 1-ին Նյու Յորքի դատարանը վերանայել էր Սթրոս Կանի դեմ Դիալոյի քաղաքացիական հայցը:
Դոմինիկ Սթրոս Կանը սկանդալի պատճառով ստիպված էր եղել հեռանալ ԱՄՀ-ից, քաղաքական կարիերայից: 2011թ. նա պատրաստվում էր իր թեկնածությունը դնել Ֆրանսիայի նախագահական ընտրություններին:
