նախընտրելի դարձնելՍենատորներն ԱՄՆ-ի պետքարտուղար Հիլարի Քլինթոնին գրեթե հիստերիայի են հասցրել Բենգազիում ԱՄՆ-ի հյուպատոսության վրա հարձակման գործի լսումների ժամանակ: Քլինթոնն իր վրա է վերցրել կատարվածի պատասխանատվությունը եւ պատմել, թե ինչ է արվել ողբերգությունը թույլ չտալու համար, սակայն սենատորներին չեն գոհացրել նրա բացատրությունները:
Հանրապետական սենատոր Ռոն Ջոնսոնը հարցրել է, թե ինչու է երկրի ղեկավարությունը շփոթեցրել մարդկանց զանգվածային անկարգությունների մասին վարկածով, երբ իրականում հյուպատոսության վրա նպատակային հարձակում է կատարվել: Քլինթոնը փորձել է բացատրել, որ դա այդպես չէ, սակայն Ջոնսոնը հետո այդ նույն հարցը կրկնել է երեք անգամ:
Երբ սենատորը չորրորդ անգամ ընդհատել է Քլինթոնին, պետքարտուղարն այլեւս չի դիմացել եւ սկսել էձայնը բարձրացնել: Նա խոսել է զայրացած եւ ձեռքով հարվածել սեղանին, գրում է utro.ru-ն:
Մի փոքր հանդարտվելով` պետքարտուղարն ասել է, որ սգում է Բենգազիում սպանված ամերիկացիների համար, եւ խոստացել է պատասխանատվության ենթարկել նրանց մահվան մեղավորներին:
Հիշեցնենք, հունվարի 23-ին Քլինթոնը մասնակցել է Բենգազիում ԱՄՆ-ի հյուպատոսության վրա հարձակման գործի լսումներին:
Հարձակման ժամանակ սպանվել էր դեսպան Քրիս Սթիվենսը: Պետդեպարտամենտի ղեկավարն ընդունել է, որ Աֆրիկայի հյուսիսում ահաբեկչության աճն ուղղակիորեն կապված է Լիբիայում Մուամար Քադաֆիի վարչակարգի տապալման հետ: Նա նաեւ հավելել է, որ Մալին վերածվել է ահաբեկիչների որջի, եւ ԱՄՆ-ն չի կարող այդ խնդիրն անտեսել:
