Ռուսաստանի պաշտպանության նախարար Սերգեյ Շոյգուն հունվարի 28-ին սկսել է իր շրջագայությունը, որի ընթացքում պաշտոնական  այցով կժամանի Հայաստան եւ Ղազախստան, հայտնել է նախարարի մամուլի քարտուղար Դարյա Զատուլինան:

«Հունվարի 28-29-ին Հայաստան այցի շրջանակում նախատեսված է Սերգեյ Շոյգուի հանդիպումը Հայաստանի նախագահ Սերժ Սարգսյանի եւ պաշտպանության նախարար Սեյրան Օհանյանի հետ»: Նա նշել է, որ այդ միջոցառումների ընթացքում նախատեսվում է քննարկել երկկողմ ռազմական եւ ռազմատեխնիկական համագործակցության դրությունը եւ հեռանկարները:

Շոյգուն հունվարի 29-ին կայցելի նաեւ Գյումրիի ռուսական 102-րդ ռազմակայան, որտեղ նրան  կզեկուցեն ռազմական պատրաստվածության կազմակերպվածության, կայանի ուսումնակրթական  վիճակի, ծառայության պայմանների եւ զինծառայողների կենցաղի մասին:

Նշենք, որ Շոյգուի հայաստանյան այցը կապված է Հայաստանում նշվող Բանակի օրվա հետ: 

«Հունվարի 29-30-ը Ռուսաստանի պաշտպանության նախարար, բանակի գեներալ Սերգեյ Շոյգուն կայցելի Ղազախստանի Հանրապետություն», - հավելել է Զատուլինան, հաղորդում է «ՌԻԱ Նովոստին»:

Ըստ նրա`  նախատեսվում է, որ Շոյգուն կհանդիպի  Ղազախստանի   ռազմաքաղաքական բարձր ղեկավարության հետ եւ կքննարկի երկկողմ հարաբերությունների ռազմական ոլորտի մի շարք հարցեր: Քննարկման հիմնական թեմաներից կլինեն հակաօդային պաշտպանության ընդհանուր համակարգերի ստեղծման, ռազմատիեզերական եւ ռազմատեխնիկական բնագավառներում համագործակցության հետագա զարգացման հարցերը, ինչպես նաեւ Ղազախստանի տարածքում ՌԴ-ի պաշտպանության նախարարության փորձարարական զորավարժարանների  գործունեությունը: