Նախընտրելի
Չիկագոյում սպանել են Բարաք Օբամայի հունվարյան երդմնակալությանը մասնակցած աղջկան՝ նրա հետ զբոսնող դեռահասների խմբին շփոթելով տեղի հանցագործների հետ:
Հունվարի 31-ին AFP-ն վկայակոչելով ոստիկանությանը, հաղորդում է, որ Հադիա Փենդլթոնին սպանել են հունվարի 29-ին՝ տասնյակ հասակակիցների հետ այգիներից մեկում զբոսնելիս: Զինված տղամարդը մոտեցել է դեռահասներին եւ կրակել՝ սպանելով աղջկան եւ վիրավորելով երկու տղաների: Ըստ Չիկագոյի ոստիկանության ներկայացուցչի՝ հավանաբար մարդասպանը դեռահասներին շփոթել է տեղական հանցախմբերից մեկի հետ, գրում է «Մոսկովսկի կոմսոմոլեցը»: Հանցագործին հաջողվել է փախչել: Չիկագոյի իշխանությունները նրա մասին ցանկացած տեղեկության համար 11 հազար դոլար պարգեւավճար են խոստացել, հայտնում է utro.ru-ն:
Փենդլթոնը հունվարի 21-ին մասնակցել էր Օբամայի երդմնակալության արարողությանը՝ դպրոցական փողային նվագախմբի կազմում:
Միջադեպին սրություն է հաղորդում այն, որ դեպքը տեղի է ունեցել զենքի վաճառքի խստացման շուրջ բուռն քննարկումների պայմաններում: Այդ հարցն առավել սուր դրվել էր Կոնեկտիկուտ նահանգի ողբերգությունից հետո, երբ 20-ամյա Ադամ Լանզան դպրոցում սպանել էր 20 երեխայի եւ վեց մեծահասակի:
