նախընտրելի դարձնել
ԱՄՆ-ի Ատլանտա (Ջորջիա նահանգ) քաղաքի «Փրայս» դպրոցում հունվարի 31-ին հրաձգության հետեւանքով վիրավորվել է երկու մարդ, որոնցից մեկը 14 տարեկան է: Տեղի իշխանությունների կարգադրությամբ դպրոցը փակվել է, ծնողները դեռ չեն կարող տուն տանել իրենց երեխաներին, հաղորդում vesti.ru-ն:
Դպրոցում կրակոցների հեղինակը աշակերտներից մեկն է եղել, հայտնում է lenta.ru-ն`վկայակոչելով Fox 5 Atlanta հեռուստաալիքին:
Ենթադրյալ հանցագործի անունը եւ տարիքը պաշտոնապես չեն հաղորդվում: Նշվում է, որ նա կրակել է աշակերտներից մեկի գլխին, որից հետո մի քանի րոպե անց ձերբակալվել է անվտանգության ծառայության աշխատակիցների կողմից: Ոստիկանությունում վստահ են, որ կրակոցները պատահական չեն եղել, դրանց նախորդել է երիտասարդների միջեւ տարաձայնությունը:
Վիրավոր աշակերտը ծանր վիճակում տեղափոխվել է հիվանդանոց: Թեթեւ վնասվածք է ստացել նաեւ դպրոցի ուսուցիչներից մեկը:
Դպրոցի տնօրինության նեկայացուցիչներն ընդգծել են, որ ուսումնական հաստատության մուտքը համալրված է մետաղրսիչներով: Այժմ ոստիկանությունը նաեւ պետք է պարզի, թե աշակերտին ինչպես է հաջողվել զենքը դպրոց բերել:
