նախընտրելի դարձնելԹեեւ Պռոշյանում տեղական ինքնակառավարման մարմնի ընտրությունների օրը հայտնի չէ, բայց գյուղում արդեն շրջանառվում են հավանական թեկնածուների անունները:
Հավանական թեկնածուներից մեկը սպանված գյուղապետի ՀՀԿ-ական մրցակից Արթուր Մուրադյանն է, ով մեզ հետ զրույցում նշեց, որ այս պահի դրությամբ նման մտադրություն չունի: Նա նշեց, որ չի կարող ասել` կփոխվի իր մտադրությունը, թե ոչ, այդ հարցը չի քննարկվել նաեւ կուսակցությունում եւ ՀՀԿ-ի տարածքային կառույցի ներկայացուցիչների հետ:
Գյուղապետի ընտրություններին մասնակցելու ցանկություն էին հայտնել նաեւ Հրաչ Մուրադյանի հարազատները: Նրա եղբոր որդին` Հակոբ Մուրադյանը, NEWS.am-ի թղթակցի հետ զրույցում ասաց, որ իրենց կողմից կառաջադրվի գյուղապետի տեղակալ Վովա Սահակյանը: Նա նշեց, որ վերջինս ՀՅԴ անդամ է, 6-7 տարի եղել է Հրաչ Մուրադյանի տեղակալը, նրա ընկերը, եւ Մուրադյանի ընտանիքը, հարազատները, որոշել են հենց նրան սատարել ընտրություններին: Սպանված գյուղապետի եղբորորդին վստահ է, որ ով էլ դնի իր թեկնածությունը, հաղթելու է Վովա Սահակյանը: Միեւնույն ժամանակ, նա նշեց, որ Կոտայքի մարզպետ Կովալենկո Շահգալդյանը միշտ փորձել է խոչընդոտներ ստեղծել, բայց չի ստացվել եւ այս անգամ էլ չի ստացվի:
Անդրադառնալով գյուղապետի սպանության գործի քննությանը` Հակոբ Մուրադյանն ասաց, որ դեռ որեւէ բան չե կարող ասել, սպասում են իրավապահներին: «Երեւի իրավապահները իրենց գործը գիտեն, ոչ մի բան չեմ կարող ասել: Հուսով ենք` վերջում կպարզվի ամեն ինչ: Եթե այդ տղաները մեղավոր չեն, ազատ կարձակվեն: Նրանք ընդունակ չեն մարդ սպանել»,- ասաց Հակոբ Մուրադյանը:
Հիշեցնենք, որ ապրիլի 2-ի առավոտյան 9.00-ի սահմաններում Պռոշյանի գյուղապետարանի դիմաց հայտնաբերվել է Պռոշյանի գյուղապետ Հրաչ Մուրադյանի դին` աջ քունքի շրջանում հրազենային վնասվածքով: Դեպքի առթիվ հարուցվել է քրեական գործ 104-րդ հոդվածի 2-րդ մասի 2-րդ կետի հատկանիշներով (սպանություն`անձի կամ նրա մերձավորի` կապված այդ անձի կողմից իր ծառայողական գործունեության կամ հասարակական պարտքի կատարման հետ) եւ 235-րդ հոդվածի 1-ի մասի (ապօրինի կերպով հրազեն, բացի ողորկափող հրազենից եւ դրա փամփուշտներից, ռազմամթերք, ակոսափող հրազենի փամփուշտներ, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) հատկանիշներով: Տարածքում պարկուճներ չեն հայտնաբերվել:
Ձերբակալվել են նույն գյուղի բնակիչներ Արայիկ եւ Արտակ Պետրոսյանները: Որպես հիմնական կասկածյալ, լրատվամիջոցներում շրջանառվում է նաեւ գյուղապետի մրցակից Արթուր Մուրադյանի անունը:
Ապրիլի 5-ին Արայիկ Պետրոսյանը կալանավորվել էր, իսկ քրեական գործով վարույթ իրականացնող մարմնի որոշման հիման վրա Արտակ Պետրոսյանն ազատվել էր արգելանքից: Գործով կալանավորված Արայիկ Պետրոսյանի դեմքից եւ քթից, ինչպես նաեւ նրա կողմից դեպքի օրը շահագործված «ՎԱԶ-2121» մակնիշի ավտոմեքենայի սրահից՝ առջեւի աջ կողմի մեջտեղի հենակի ներսի կողմից, առջեւի ձախ դռան շրջանակից եւ պաստառի ներսի կողմից, համեմատական հետազոտության նպատակով խծուծների վրա վերցված նմուշներում դատաքիմիական փորձաքննությամբ հայտնաբերվել են կրակոցի արգասիքներ հանդիսացող անտիմոնի մետաղացման հետքեր:
Արգելանքից ազատվելուց օրեր անց Արտակ Պետրոսյանը ձերբակալվել, ապա` կալանավորվել էր խուլիգանության մեղադրանքով: Դա կապված է սեպտեմբերի 23-ին տեղի ունեցած ՏԻՄ ընտրություններից հետո Պռոշյանի սպանված գյուղապետ Հրաչ Մուրադյանի եւ նրա ՀՀԿ-ական մրցակից Արթուր Մուրադյանի միջեւ տեղի ունեցած վիճաբանության հետ, այդ ժամանակ նա դեպքի վայրում է եղել: Փաստի առթիվ նյութեր էին ստեղծվել եւ 2012թ հոկտեմբերի 5-ին, այդ նյութերով որոշում է կայացվել Քրեական դատավարության օրենսգրքի 35-րդ հոդվածի 1-ին մասի 1-ին կետի հատկանիշներով մերժել քրեական գործի հարուցումը: Ըստ այդ հոդվածի` քրեական գործ չի կարող հարուցվել եւ քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե բացակայում է հանցագործության դեպքը: Այժմ վերացրել են քրեական գործ չհարուցելու մասին մերժումը եւ քրեական գործ են հարուցել ՔՕ-ի 258-րդ հոդվածի 3-րդ մասի 1-ին կետի հատկանիշներով: Այդ հոդվածով սահմանվում է խուլիգանությունը, որը կատարվել է մի խումբ անձանց կամ կազմակերպված խմբի կողմից: Այս գործի շրջանակներում կալանավորվել է նաեւ ձերբակալված մյուս երիտասարդը` Արտյոմը:
