նախընտրելի դարձնելԱյսօր` հունիսի 11-ին, ժամը 19.30-ին Հայ Ազգային Կոնգրեսի վարչության անդամ, ԱԺ պատգամավոր Գագիկ Ջհանգիրյանը սեփական նախաձեռնությամբ այցելել է ՀՀ ՊՆ քննչական ծառայություն և պատասխանել քննիչի հարցերին: Այդ մասին հայտնում են Հայ ազգային կոնգրեսի մամուլի ծառայությունից:
Ինչպես ավելի վաղ հայտնել էր NEWS.am-ը, ՀԱԿ խմբակցության պատգամավոր, նախկին զինդատախազ Գագիկ Ջհանգիրյանին կանչել են ՊՆ քննչական ծառայության քննչական բաժին՝ Սուրեն Խաչատրյանի առանձնատան մոտ կատարված հանցագործության գործով:
ՊՆ քննչական ծառայության տարածած հաղորդագրության մեջ նշվում է.
«Չորրորդ Ինքնիշխանություն» թերթի 11.06.2013թ. համարում «Վիրավորների թիվը երկուսից ավելի է» վերտառությամբ հոդվածում հրապարակվել է «Civilnet» ինտերնետային հեռուստաընկերության տաղավարում ՀՀ ԱԺ ՀԱԿ խմբակցության պատգամավոր Գագիկ Ջհանգիրյանի խոսքերը, որում վերջինս` անդրադառնալով 2013թ. հունիսի 1-ին Սյունիքի նախկին մարզպետ Սուրեն Խաչատրյանի առանձնատան մոտ կատարված հանցագործությանը, հայտարարել է. «Տեղի է ունեցել ծանրագույն հանցագործություն: Մեկը սպանվել է, բանակի սպան, հրամանատարը ծանր վիրավորվել են: Էլի վիրավոր կա: Ես վստահ եմ, որ էդ երկուսը չեն վիրավորվել: Իմ տեղեկություններով` վիրավորների թիվն ավելի շատ է»:
Գ.Ջհանգիրյանի կողմից ներկայացրած տեղեկատվության աղբյուրը եւ դրա ճշմարտացիությունը ստուգելու համար ՀՀ ՊՆ ՔԾ ՀԿԳ քննչական բաժնի վարույթում քննվող քրեական գործով քննիչի կողմից ծանուցագիր է ուղարկվել Գ.Ջհանգիրյանին` 13.06.2013թ. ժամը 10:00-ին ՀՀ ՊՆ ՔԾ ՀԿԳ քննչական բաժին կանչելու եւ գործով որպես վկա հարցաքննելու համար»:
