Նախընտրելի
Հայաստանի ոստիկանությունը հայտարարություն է տարածել հուլիսի 22-ին տեղի ունեցած բողոքի ակցիաների կապակցությամբ:
«Հուլիսի 22-ին, ժամը 11.00-ի սահմաններում, Մաշտոցի պողոտայի տարբեր հատվածներում, մի խումբ անձինք խախտելով ճանապարհային երթեւեկության անվտանգությունը, դուրս գալով երթեւեկության բանուկ գոտի` երթուղային միկրոավտոբուսների դիմապակիներին փակցրել են տարբեր բնույթի կոչեր: Այս գործողություններով հիշյալ անձինք ոչ միայն խախտել են հասարակական կարգը, այլեւ, ցավոք, անտեսել այն իրողությունը, որ ուղեւորափոխադրումներ իրականացնող վարորդի բարոյահոգեբանական վիճակով է պայմանավորված մեր քաղաքացիների անվտանգությունը, իսկ նման հոգեբանական վիճակում վարորդի երթեւեկելը կարող է հանգեցնել անցանկալի, անգամ ողբերգական հետեւանքների:
Եվ նույնիսկ այս պայմաններում ոստիկանության ծառայողները հանդուրժողական վերաբերմունք են դրսեւորել «Հավաքների մասին» ՀՀ օրենքի պահանջների խախտումով անցկացված հավաքի մասնակիցների նկատմամբ` բացատրելով նրանց գործողությունների ոչ միայն անօրինական լինելը, այլեւ հնարավոր բոլոր վտանգավոր հետեւանքները:
Չնայած դրան, հավաքի առանձին մասնակիցներ չեն ենթարկվել ոստիկանների հորդորներին եւ օրինական պահանջներին, փորձել են դիմադրություն ցույց տալ ոստիկանության ծառայողներին` խոչընդոտելով վարորդների աշխատանքը, ինչը եւ կանխվել է ոստիկանության ծառայողների կողմից:
Ոստիկանությունը կրկին հիշեցնում է, որ ուղեւորափոխադրումներ իրականացնող վարորդների հոգեվիճակի խաթարումը կարող է մարդկային կյանքեր արժենալ:
Ոստիկանությունը կոչ է անում հարգել համակեցության կանոնները եւ ձեռնպահ մնալ երթեւեկության յուրաքանչյուր մասնակցի իրավունքները խոչընդոտելուց, իսկ այն անձինք, ովքեր ոստիկանության դրսեւորած հանդուրժողականության պայմաններում հանդգնել են խախտել օրենքի պահանջները, կհայտնաբերվեն ու կենթարկվեն պատասխանատվության»,- ասված է ոստիկանության հայտարարության մեջ:
