«Մահմեդական եղբայրները» հայտնում են Եգիպտոսում իրենց իսկ հրահրած խռովությունների բազմաթիվ զոհերի մասին: «Մահմեդական եղբայրների» կայքը տեղեկացնում է հուլիսի 27-ի գիշերը իսլամիստների հետ ՆԳՆ-ի ուժերի բախումների հետեւանքով 120 զոհերի մասին` Կահիրեի Ռավիա ալ Ադավիա հրապարակում:

Շարժումը կատարվածն անվանել է  «մարդկանց զանգվածային ոչնչացում»: Ըստ ականատեսների`  հրապարակին հարակից թաղամասերում բախումների ժամանակ   անջատել էին հեռախոսակապը, չի գործել համացանցը, մարդիկ չեն կարողացել զանգահարել շտապօգնություն եւ հայտնել կատարվածի մասին, հաղորդում է «ՌԻԱ Նովոստին»:

Եգիպտոսի տարբեր քաղաքներում հուլիսի 26-ին տեղի են ունեցել բողոքի զանգվածային ցույցեր  բանակի կողմնակիցների եւ   հակառակորդ  «Մահմեդական եղբայրների» մասնակցությամբ:

Ամբողջ երկրում փողոց է դուրս եկել 35 միլիոն մարդ:  Բախումներն ու անկարգությունները սկսվել էին ուշ երեկոյան եւ շարունակվել մինչեւ ուշ գիշեր: Ամենադաժան փողոցային մարտերը տեղի են ունեցել Կահիրեում եւ Ալեքսանդրիայում: ՆԳՆ-ից հայտնել են, որ  ոստիկանությունը միայն արցունքաբեր գազ է կիրառել, իսկ հրազեն  կիրառել են քաղաքացիական անձինք: