Ադրբեջանի լրատվամիջոցները Հայաստանի հասցեին նոր մեղադրանքների առիթ են գտել: Այս անգամ խոսքը ոչ ավելի, ոչ պակաս՝ միջուկային զենքի մասին է:

Vesti.Az -ում տարօրինակ հրապարակում է հայտնվել: Կրասնոդարի ոմն բնակիչ իբր խմբագրությանը նամակ է ուղարկել,  որի նպատակն է եղել բացահայտել «հայերի դավերը»:  Հրապարակված նամակում մանրամասն  շարադրված է Կրասնոդարի պաշտպանական հիմնարկներից մեկից ռադիոկատիվ սարքավորումների թալանման պատմությունը: Սարքավորումները գողացած մարդն այն չի հասցրել վաճառել, քանի որ վախճանվել է ճառագայթումից: Դրա փոխարեն այդ մարդու որդին սարքավորումը ոստիկանությանն է հանձնել, որտեղ էլ պարզել են կողոպուտի փաստը:

Նամակում անհամապատասխանությունների մի ամբողջ շարք կա: Դրանցից ամենագլխավորն այն է, որ եթե  գողացված սարքավորումը մի մարդու մահվան պատճառ է դարձել, ապա այն ինչո՞ւ չի ազդել նրա  ընտանիքի անդամների, հարեւանների վրա: Ռադիոակտիվ սարքավորման ոչ կողոպտչի, ոչ էլ ենթադրյալ գնորդի անունները չեն նշվում: Փոխարենը շեշտակի  եզրահանգում են կատարում հայկական հատուկ ծառայությունների մասնակցության վերաբերյալ:

Այդ անհեթեթության հիման վրա խմբագրությունը դեպքերի մի քանի վարկած է ներկայացնում: Հատկանշական է, որ բոլորն էլ ծիծաղելի են: Առաջին վարկածը ենթադրում է գողացված սարքավորման հանձնումը Իրանին:

Երկրորդ վարկածը ամենաանարդյունավետն է Ադրբեջանի համար: Ըստ ադրբեջանցիների՝ Հայաստանը կարող է ռադիոակտիվ նյութեր կիրառել Ադրբեջանի խաղաղ բնակչության դեմ:

Երրորդ վարկածի դեպքում ռադիոակտիվ նյութերը «ահաբեկիչներին են փոխանցվում»: Անհեթեթ եզրակացությունները հեղինակին հանգեցնում են  «կեղտոտ ռումբի» ստեղծման մտքին:

«Ադրբեջանի արտգործնախարարությունը պետք է տեղեկացնի  միջազգային հանրությանը միջուկային զենքի հետ կապված հայերի գաղտնի գործողությունների մասին», - հայտարարում է հոդվածի հեղինակը:

 Այսպիսով,  կեղծ նամակը եւ դրա հիման վրա արված անհեթեթ ենթադրությունները կարող են հերթական անհիմն մեղադրանքների պատճառ դառնալ: