նախընտրելի դարձնել
ՀՀ նախագահ Սերժ Սարգսյանը օրեր առաջ հրամանագիր էր ստորագրել ՀՀ նախագահին առընթեր սահմանադրական բարեփոխումների մասնագիտական հանձնաժողով ստեղծելու մասին, սակայն, ինչպես ավելի վաղ հայտնել ենք հանձնաժողովի անդամները դեռեւս հստակ չգիտեն` ինչ են բարեփոխվելու եւ ինչպես: Այս մասին գրում է «168 ժամ» թերթը եւ հավելում. «ՀՀ արդարադատության նախարար Հրայր Թովմասյանից հետաքրքրվեց, թե, ի վերջո, ի՞նչ բարեփոխումներ է իրականացնելու ձեւավորված հանձնաժողովը: Ի պատասխան՝ նա ասաց. «Եթե այս պահին հանձնաժողովի անդամներից մեկը իմանար՝ ի՞նչ է բարեփոխվելու, տրամաբանական կլիներ, որ նախագահը ոչ թե հանձնաժողով կստեղծեր, այլ՝ արդարադատության նախարարին կհանձնարարեր բարեփոխումներ իրականացնել:
Երբ հանձնաժողով է ստեղծված, նշանակում է, որ այն կոլեգիալ մարմին է եւ որոշումներ կկայացնի, որոնց մասին դուք տեղյակ կլինեք: Այս պահին ինչ-որ հնարավոր համարելուն կամ չհամարելուն անդրադառնալ չեմ կարող: Ես ունեմ իմ կարծիքը, բայց այդ կարծիքը ես չեմ հրապարակի: Կա հանձնաժողով, որը կհրապարակի»:
Բարեփոխման օբյեկտը, փաստորեն, կորոշվի ընթացքում, իսկ հանձնաժողովի նպատակը, Հրայր Թովմասյանի խոսքով՝ մեկն է. «Նպատակը շատ հստակ նախագծի հրամանագրի նախաբանում գրված է՝ իրավունքի գերակայության, իրավունքների առավել արդյունաետ երաշխիքներ, առավել արդյունավետ կառավարում»»,- մեջբերում է «168 ժամը» (Մանրամասները՝ թերթի այսօրվա համարում):
