Եզնիկ Կողբացի փողոցի տներից մեկի բակում սեպտեմբերի 5-ի գիշերը ակտիվիստներ Սուրեն Սաղաթելյանին եւ Հայկակ Արշամյանին մարզական կազմվածքով 7-8 հոգու կողմից ծեծի ենթարկվելու դեպքի առթիվ, այսօր՝ սեպտեմբերի 13-ին, վերջապես հարուցվել է քրեական գործ: Այս մասին NEWS.am-ի թղթակցի հետ զրույցում հայտնեցին ոստիկանության լրատվական ծառայությունից:

Անհայտ անձանց կողմից Երեւանի մամուլի ակումբի ծրագրերի համակարգող Հայկակ Արշամյանին եւ «Թրանսփարենսի Ինթերնեյշնլ» հակակոռուպցիոն կենտրոնի խորհրդի անդամ Սուրեն Սաղաթելյանին դաժան ծեծի ենթարկելու փաստով ոստիկանության Կենտրոնի քննչական բաժնում հարուցվել է քրեական գործ ՀՀ քր.օր.-ի 113 հոդվածով՝ դիտավորությամբ միջին ծանրության վնաս պատճառելը:

Մեր տեղեկություններով, քրգործի շրջանակներում նրանց հրավիրել են ոստիկանության կենտրոնականի բաժին:

Ավելի վաղ NEWS.am-ի թղթակցի հետ զրույցում ոստիկանությունից  փոխանցել էին, որ սեպտեմբերի 5-ին, ժամը 22.20-ին,  ոստիկանության Երեւան քաղաքի վարչության օպերատիվ կառավարման կենտրոնից  ոստիկանության Կենտրոնականի բաժնում հաղորդում է ստացվել, որ իրենց է զանգահարել 37-ամյա Սուրեն Ս.-ն եւ հայտնել, որ Երեւանի Տեր-Գաբրիելյան եւ Ե. Կողբացի փողոցներում 6-7 հոգի հարձակվել եւ ծեծի են ենթարկել իրենց:  Ժամը 23.20-ին էլ  թիվ 1 համալսարանական հիվանդանոցից ոստիկանության Կենտրոնականի բաժնում հաղորդում է ստացվել, որ «պոլիտրավմա» ախտորոշմամբ բուժօգնության է տեղափոխվել 42-ամյա Հայկակ Ա.-ն, որը հիվանդանոցում հայտարարել է, որ ծեծի է ենթարկվել Ե. Կողբացու փողոցի թիվ 2 շենքի բակում: Ժամը 23.25-ին նույն հիվանդանոցից հաղորդում է ստացվել, որ «պոլիտրավմա» ախտորոշմամբ՝ բուժօգնության է տեղափոխվել Սուրեն Ս.-ն:  Նշանակվել են դատաբժշկական փորձաքննություններ: Կատարվում է հետաքննություն:

Իսկ Հայկակ Արշամյանը պատմել էր. «Մարզված հաստավզեր էին: Նրանք կոնկրետ նպատակով գիտեին ինչի համար էին եկել: Ոստիկանությունը եւ շտապօգնությունը շատ շուտ արձագանքեցին մեր կանչին եւ եկան»: Նա նաեւ հավելել էր, որ այս գործողությունները չեն կարող խոչընդոտ հանդիսանալ իրենց պայքարին: