նախընտրելի դարձնել
Վրաստանի Օզուրգեթի շրջանի Դվաբզու եւ Գագմա Դվաբզու գյուղերում սեպտեմբերի 18-ին տարհանել են դպրոցականներին՝ ռումբի մասին զգուշացնող զանգից հետո:
«Պիրվելի ռադիո»-ի տվյալով՝ անհայտ անձը զանգահարել է Վրաստանի ՆԳՆ անհետաձգելի օգնության կենտրոնի «112» հեռախոսահամարով եւ հայտնել դպրոցներում ռումբի առկայության մասին: Այս պահին տեղերում աշխատում են ականազերծողներ, կինոլոգներ եւ քրեական ոստիկանության աշխատակիցներ:
Հիշեցնենք, Վրաստանում վերջին շաբաթներին ռումբի մասին կեղծ ահազանգերի իսկական համաճարակ է սկսվել: Իրավապահները ստիպված են եղել մի քանի անգամ ստուգել «Իմեդի», «Ռուսթավի-2» եւ «Մաեստրո» հեռուստաալիքների շենքերը, նաեւ՝ Քութայիսում գտնվող Վրաստանի խորհրդարանի շենքը, Թբիլիսիի միջազգային օդանավակայանը եւ Խաշուրիում ProСredit Bank –ի մասնաճյուղը:
Երկրի ՆԳՆ-ն մշտապես հեռախոսային ահաբեկիչների է բռնում, որոնց մեծ մասն անչափահաս են:
«Նովոստի Գռուզիան» հայտնում է, որ Վրաստանի խորհրդարանն արդեն աշխատում է քրեական եւ վարչական օրենսգրքերի խստացման ուղղությամբ՝ ահաբեկչության մասին կեղծ ահազանգերի պատժաչափն ավելացնելով մինչեւ հինգ տարվա ազատազրկման:
