Ռուսաստանի հետ հարաբերությունների կարգավորման հարցով Վրաստանի վարչապետի հատուկ ներկայացուցիչ Զուրաբ Աբաշիձեն կարծում է, որ Վրաստանի  հետ Հարավային Օսիայի վարչական սահմանին իրավիճակի սրացումը դիտմամբ է արվում՝ պայմանավորված Ռուսաստանի արտգործնախարարի տեղակալ Գրիգորի Կարասինի հետ առաջիկա հանդիպմամբ:  

«Ցավալի է, որ մեր վերջին հանդիպումներից առաջ Ցխինվալի մարզի (Հարավային Օսիա) վարչական սահմանին իրադրության նման լարվածություն է տեղի ունենում: Այնտեղ միշտ բարդ  իրավիճակ է, սակայն դա հատկապես սրվում է մեր ամեն հանդիպումից առաջ:  Շատ դժվար է հավատալ, որ սա հատուկ չի արվում», - Թբիլիսիի միջազգային օդանավակայանում լրագրողներին հայտնել է Աբաշիձեն: 

«Նովոստի Գռուզիան»տեղեկացնում է, որ սեպտեմբերի 18-ին Աբաշիձեն մեկնել է Պրահա, որտեղ սեպտեմբերի 19-ին նախատեսված է Կարասինի հետ հերթական հանդիպումը:

Ըստ վրացական կողմի՝ սեպտեմբերի 17-ին հակամարտության գոտում իրավիճակի լարվածությունը պայմանավորված էր Վրաստանի Գորիի շրջանի Դիցի գյուղի մոտ պատնեշ եւ փշալար անցկացնելու փաստով: Տեղի բնակիչները փորձել են խոչընդոտել այդ աշխատանքներին, քանի որ, ըստ նրանց, վրացիների մի քանի տներ եւ այգիներ կմնան փշալարերից այն կողմ:  Ըստ ռուսական լրատվամիջոցների՝ ռուս սահմանապահներն առաջնորդվում են խորհրդային Հարավային Օսիայի քարտեզով: Նշվում է նաեւ, որ Հարավային Օսիան Վրաստանին վաղուց է առաջարկել   համատեղ հանձնաժողով ստեղծել՝ սահմանազատման նպատակով, սակայն Թբիլիսին դեմ է հանդես եկել՝ Հարավային Օսիայի եւ Աբխազիայի տարածքները համարելով «զավթված»:

Վրաստանի ԱԳՆ-ն Ռուսաստանին մեղադրել է միջազգային իրավունքի կոպիտ խախտման համար եւ միջազգային հանրությանը կոչ է արել համապատասխան գնահատական տալ կատարվածին: