նախընտրելի դարձնել
Հայաստանի փոխվարչապետ, տարածքային կառավարման նախարար Արմեն Գեւորգյանի մոտ այսօր մարզպետների մասնակցությամբ կայացած խորհրդակցության ընթացքում քննարկվեցին 2014թ. մարզպետարանների բյուջետային հայտերի, ինչպես նաեւ 2014թ. հունվարի 1-ից նվազագույն աշխատավարձի բարձրացմամբ պայմանավորված համայնքային ենթակայության հիմնարկների աշխատակիցների աշխատավարձերի հետ կապված հարցեր:
ՏԿՆ մամուլի ծառայությունից հայտնում են, որ փոխվարչապետը մարզպետներին հանձնարարել է ներկայացնել համապատասխան հաշվարկները, ինչպես նաեւ հնարավոր խնդիրների եւ դրանց լուծումների վերաբերյալ առաջարկությունները:
Քննարկվել է նաեւ 2014թ. ՀՀ պետական բյուջեից ֆինանսական համահարթեցման սկզբունքով համայնքներին տրամադրվող դոտացիաների հարցը: Տեղեկացվել է, որ 2014թ-ին դոտացիաներն առաջին անգամ հաշվարկվելու են` հիմնվելով Բնակչության պետական ռեգիստրի տվյալների վրա:
Փոխվարչապետը կարեւորել է համայնքների ղեկավարների եւ ՀՀ ոստիկանության համապատասխան ստորաբաժանումների հետ համատեղ աշխատանքը` ռեգիստրի տվյալների ճշգրտման ուղղությամբ, որից հետո միայն կկատարվի դոտացիաների հաշվարկը: 2014թ. համար համայնքներին տրամադրվող դոտացիաների ընդհանուր ծավալը նախատեսվում է շուրջ 39 մլրդ դրամ, ինչը 2,7 մլրդ դրամով գերազանցում է 2013թ. ցուցանիշը:
Անդրադարձ է եղել նաեւ հողօգտագործողներին 2013 թ. աշնան գյուղատնտեսական աշխատանքների համար մատչելի գնով ազոտական պարարտանյութի, դիզվառելիքի եւ աշնանացան ցորենի առաջին վերարտադրության սերմացուի բաշխման ծրագրերի ընթացքին: Փոխվարչապետը կարեւորել է նաեւ աշնանացանի ընթացքում ոռոգման աշխատանքների արդյունավետ կազմակերպումը եւ ջրօգտագործողների ընկերությունների հետ համագործակցությունը` ձեւավորված հասույթների դիմաց վարձավճարների ամբողջական հավաքագրման հարցում:
