Շիրակի մարզում 15 տարի առաջ ոմն Դիանյայի սպանած եւ դիակը թաքցրած Գոգհովիտ գյուղի բնակիչ, 46-ամյա Արմեն Շահբազյանը մեկ անգամ էլ է ձերբակալվել Ռուսաստանի Դաշնությունում՝ խմբակային կռվի մասնակցելու համար: Այս մասին NEWS.am-ի թղթակցի հետ զրույցում պատմեցին Գոգհովիտ գյուղի բնակիչները:

«Ռուսաստանում խմբակային վիճաբանության ժամանակ Արմենը դանակահարվել է: Մյուսները դեպքի վայրից փախել են եւ միայն նա է կալանքի վերցվել: Բայց, քանի որ փախուստի դիմածները չեն հայտնաբերվել, իրեն էլ են ազատ արձակել»,- պատմեցին գյուղացիները:

Իսկ Դիանայի սպանության մասով նշեցին, թե Արմենը պատմել է, որ սպանությունը պատահականություն է  եղել: «Իր պատմելով՝ մահացածն իր գումարը վերցրել է եւ վիճաբանության ընթացքում, երբ հրել է, Դիանան սայթաքել է եւ գլուխը կպել է պատուհանագոգին»,- նշեցին գոգահովիտցիները:

Համագյուղացիների պատմելով Արմենը զբաղվում էր հողագործությամբ, ամուսնացած է, ունի 3 աղջիկ եւ մեկ տղա: Աղջիկներից մեկն էլ ամուսնացած է: 

Ավելի վաղ տեղեկացրել էինք, որ Շիրակի մարզում սեպտեմբերի 18-ին, ոստիկանությունը բացահայտել է 15 տարի առաջ տեղի ունեցած սպանությունը: Այս մասին NEWS.am-ը տեղեկացել էր  ոստիկանության Շիրակի բաժնից:  Շիրակի մարզի Գոգհովիտ գյուղի բնակիչ, 46-ամյա Արմեն Շահբազյանը խոստովանել է, որ  իր հայրական տանը 15 տարի առաջ վիճաբանել է ոմն  Դիանայի հետ, որի ժամանակ ինքը հարվածներ է հասցրել նրան:  Հարվածից հետո Դիանան  գիտակցության չգալով մահացել է:

Նա նաեւ ցույց է տվել իրենց  հին գյուղում գտնվող այն շինությունը, որտեղ թաղել է  մահացածին: Մատնանշված վայրից իրավապահները դուրս են բերել մահացածի դին: Գոգհովիտի գյուղացիներն էլ հայտնեցին, որ Արմեն Շահբազյանը իրենց գյուղից է, սակայն Դիանան իրենց գյուղի բնակիչ չէ: Նաեւ նշել էին, որ սպանությունը տեղի է ունեցել գումարի պատճառով: