ԵվրաՆեսթի խորհրդարանական վեհաժողովում Ադրբեջանի պատվիրակության ղեկավար Էլհան Սուլեյմանովը ցուցադրաբար լքել է Կիեւում ընթացող նիստի դահլիճը` ի նշան խորհրդարանական վեհաժողովի բանաձեւի դեմ բողոքի:

ԱՊԱ-ի փոխանցմամբ` Սուլեյմանովի հայտարարությունում նշվում է, որ նա այդկերպ իր բողոքն է հայտնում «կազմակերպության կողմից Ադրբեջանի դեմ չլսված հարձակումների, որը բարեկամության, վստահության եւ համագործակցության խորհրդանիշ է»:

Հիշեցնենք, որ ավելի վաղ ԵվրաՆեսթի խորհրդարանական վեհաժողովում Ադրբեջանի պատվիրակությունը, ղեկավար Էլհան Սուլեյմանովի գլխավորությամբ, Եվրախորհրդարանին  մեղադրել էր ընտրություններին կողմնակալ  գնահատական տալու, Բաքվում խռովություններ կազմակերպելու  համար  եւ հայտարարել, որ Ադրբեջանը կասեցնում է իր մասնակցությունը տվյալ կառույցում:

Սուլեյմանովի հայտարարության մեջ ասվում է գրեթե նույնը, խորհրդարանականը բացարձակ  համաձայն չէ ընտրությունների քննադատությանը: Նա ավելի առաջ է գնացել եւ ԽՎ-ի առաջ պայմաններ դրել.

1. Քանի դեռ չեն քննվել այդ դրույթի հայտնվելու պատճառները եւ համապատասխան միջոցներ չեն ձեռնարկվել, ադրբեջանական կողմը ստիպված է մտածել ԵվրաՆեսթի ԽՎ-ի հետ համագործակցության ապագա ձեւաչափի մասին;

2. Քանի դեռ չեն ազատագրվել «զավթված տարածքները»,  Ադրբեջանը` որպես Արեւելյան գործընկերության բաղադրիչ, կասեցնում է այդ կառույցում իր գործունեությունը ԵվրաՆեսթի ԽՎ-ում Հայաստանի նախագահության ժամանակահատվածում:

Թե ինչ կապ ունի Հայաստանը Ադրբեջանի նախագահական ընտրակեղծիքների հետ, Սուլեյմանովը չի մաանրամասնել: