նախընտրելի դարձնելԱլավերդիի մկնդեղի թափոնների գերեզմանոցը, որը Ալավերդու պղնձաձուլական գործարանի խորհրդային տարիների պոչամբարն է, առաջիկա կես տարում կենթարկվի հետազոտության՝ պարզելու դրա վտանգավորության աստիճանն ու ազդեցությունը շրջակա միջավայրի վրա: Հաղորդում է «Ազատություն» ռադիոկայանը:
Հետազոտության պատվիրատուն ոչ թե պետությունն է, այլ տեղական «Անահիտ» կանանց աջակցության կենտրոնը, որին ֆինանսական աջակցություն է ցուցաբերել ԵԱՀԿ-ի երեւանյան գրասենյակը:
Այդ կենտրոնի ղեկավար, լրագրող Լարիսա Փարեմուզյանը այդ ուսումնասիրությունների արդյունքները՝ վտանգները կանխարգելելու պահանջով ներկայացնելու է ինչպես տեղի, այնպես էլ պետական իշխանություններին, ու «Մանես» ԲԲԸ-ին, որին պատկանում է մկնդեղի գերեզմանոցը:
Մկնդեղի գերեզմանոցի շրջակայքում Պետական հիգիենիկ հակահամաճարակային տեսչության Լոռու մարզային կենտրոնի ուսումնասիրությունները ցույց են տվել, որ գերեզմանոցի շրջակայքի ու հարեւան «Մադան» թաղամասի հողում մկնդեղի պարունակությունը 5-26 անգամ գերազանցում է սահմանված թույլատրելի խտությունը: Մինչդեռ «Մանես» ԲԲԸ-ում տեղյակ չէին ո'չ կենտրոնի վերջին ուսումնասիրությունների արդյունքների ու ո'չ էլ վտանգավորության մասին:
Ընկերության ղեկավար Աղվան Հովհաննիսյանն ասում է, թե եթե պարզվի, որ այն իսկապես վտանգավոր է, միջոցներ կձեռնարկեն:
