նախընտրելի դարձնելԵրեւանում հաշվառված են շուրջ 53000 սահմանափակ կարողություններով անձիք, որոնցից շուրջ 3000 երեխաներ են: Այս մասին նշվել է այսօր՝ փետրվարի 19-ին, Երեւանում կայացած խորհրդակցության ժամանակ:
Նրանց հիմնախնդիրների լուծման նպատակով քաղաքապետարանում ստեղծված է «Հաշմանդամություն ունեցող անձանց հիմնահարցերի Երեւանի քաղաքային հանձնաժողով», որն իր գործունեությամբ զգալիորեն նպաստում է մայրաքաղաքում նրանց խնդիրների լուծմանը, Երեւան քաղաքն առավել մատչելի եւ հարմարավետ դարձնելուն, ինչպես նաեւ տարաբնույթ սոցիալական աջակցությունների եւ ծառայությունների մատուցմանը»,-նշել է քաղաքապետարանի աշխատակազմի սոցիալական ապահովության վարչության պետ Ռուզաննա Զաքարյանը:
Անդրադառանալով 2013 թվականին սիրիահայ ընտանիքների համար իրականացված աջակցության ծրագրերին նշվել է, որ հարյուրավոր ընտանիքների տրամադրվել է ինչպես ֆինանսական, այնպես էլ կենցաղային իրերի, հագուստեղենի եւ պարենային աջակցություններ: Բացի այդ՝ շատերը ընդգրկվել են պետական սոցիալական աջակցության ծրագրերում, տեղավորվել են աշխատանքի, ստանում են նպաստ կամ կենսաթոշակ։
Ռուզաննա Զաքարյանը կարեւոր ձեռքբերում է համարել անօթեւանների հավաքագրման եւ ժամանակավոր կացարանում տեղավորման ծրագրի իրականացումը, որը քաղաքապետարանի նախաձեռնությամբ մեկնարկել է 2011թ. դեկտեմբերի 20-ից։
Մինչեւ 2013թ. ավարտը «Հանս Քրիստիան Կոֆոեդ» հիմնադրամի հետ հավաքագրվել եւ կացարան են տեղափոխվել 225 անօթեւան, որոնցից 85-ը միայն 2013թ. ընթացքում: Իրականացված աշխատանքների շնորհիվ նրանց մեծ մասը ապահովել է աշխատանքով կամ վերադարձվել է ընտանիք: 2014 թվականի հունվարից ՀՀ աշխատանքի եւ սոցիալական հարցերի նախարարության ենթակայության Երեւանի թիվ 1 տուն-ինտերնատին կից անօթեւանների ժամանակավոր կացարանը միավորվել է Հայ-Դանիական «Հանս Քրիստիան Կոֆոեդ» բարեգործական հիմնադրամի շենքում գործող անօթեւանների ժամանակավոր կացարանի հետ::
Նշվել է, որ ներկայում Երեւանում գործող բարեգործական 16 ճաշարանից օգտվում է շուրջ 2400 շահառու։
Երեւան քաղաքի ավագանու համապատասխան որոշումների համաձայն՝ գույքահարկի գծով արտոնություն է տրամադրվել Արցախյան պատերազմի 1-ին եւ 2-րդ խմբի, Հայրենական պատերազմի վետերաններին, Աֆղանական պատերազմի 1-ին եւ 2-րդ խմբի հաշմանդամներին՝ սեփականության իրավունքով պատկանող Երեւան քաղաքում հաշվառված գույքահարկով հարկվող օբյեկտ համարվող բնակելի նշանակության շինությունների, իսկ դրանց բացակայության դեպքում այն բնակելի նշանակության շինություններ մասով:
Սոցիալական ապահովության վարչության պետը նաեւ տեղեկացրել է, որ 2014 թվականի հունվարի 1-ից հետո ծնվող երեխաների համար միանվագ նպաստները այսուհետ վճարվում են սոցիալական ապահովության պետական ծառայության տարածքային մարմինների կողմից:
