նախընտրելի դարձնել
Համացանցային հսկա Google-ը հայտարարել է սեփական ինքնակառավարվող ավտոմեքենաներ թողարկելու մտադրության մասին։ Ըստ ընկերության՝ համակարգիչն ավելի ապահով է վարում, քան մարդը։
Google-ն արդեն վաղուց է զբաղվում մեքենաների համակարգչային կառավարման տեխնոլոգիաների մշակմամբ, սակայն մինչեւ հիմա այդ սարքավորումները փորձարկվում էին այլ արտադրողների ավտոմեքենաների վրա։
Սկզբի համար ընկերությունը նախատեսում է հարյուրավոր ինքնակառավարվող մեքենաներ թողարկել, որոնք չեն ունենա ղեկ, ոտնակ, այլ միայն «Կանգ» եւ «Մեկնարկ» կոճակները, փոխանցում է BBC-ի ռուսական ծառայությունը:
Այս տեխնոլոգիայի կողմնակիցները կարծում են, որ այն կնվազեցնի վթարների թիվը: Սակայն այլ փորձագետներ կանխատեսում են, որ այդպիսի մեքենաները կդժվարացնեն երթեւեկությունը ճանապարհներին, եւ խցանումներն ավելի կշատանան:
Նշենք, որ շվեդական Volvo ավտոկոնցեռնը նույնպես զբաղվում է նման գաղափարի մշակմամբ եւ վերջերս հայտարարել է այդպիսի հարյուրավոր մեքենաներ արտադրելու ծրագրերի մասին:
