Google-ը մտադիր  է եվրոպական երկրների համար նոր ծառայություն թողարկել, որը թույլ կտա որոնման արդյունքներից հեռացնել օգտվողների անձնական կյանքին վերաբերող տվյալները:

Ընկերությունը ստիպված էր այդ քայլին դիմել Եվրադատարանի որոշման պատճառով. այն սահմանել էր, որ հնացած կամ ոչ արդիական անձնական տվյալների հղումները պետք է հեռացվեն  որոնողական համակարգի ցանցից, փոխանցում է BBC-ի ռուսական ծառայությունը:

Financial Times-ի հետ հարցազրույցում Google-ի գործադիր տնօրեն Լարի Փեյջը հայտարարել է, որ ընկերությունը կկատարի ԵՄ-ի բարձրագույն ատյանի վճիռը, սակայն նախազգուշացրել է, որ դա կարող է վնասել նորարարություններին եւ կբխի խոսքի ազատությունը ճնշող վարչակարգերի շահերից:

Ավելի վաղ Google-ը հիասթափություն էր հայտնել Եվրադատարանի այն վճռի կապակցությամբ, որով օրինականացվել էր այսպես կոչված  «մոռացված լինելու իրավունքը»:

Google-ը եւ շատ իրավաբաններ կարծում են, որ ըստ եվրոպական գործող օրենսդրության, այդ օրենքը տարածվում է միայն ոչ ամբողջական կամ սխալ տեղեկատվության վրա: