ՆախընտրելիԱնգլիա – ԱՄՆ` 1:1
Աշխարհի գավաթ-2010, C խումբ, 1-ին տուր. Անգլիա – ԱՄՆ
12 հունիսի, Ռուստենբուրգ. Ռոյալ Բաֆոկեն ստադիոն
Մրցավար` Կարլուշ Սիմոն – Բրազիլիա
Ջերարդ, 4 (1:0), Դեմփսի, 40 (1:1)
Արագ գոլերի օր աշխարհի առաջնությունում եւ ամենաարագն արարեց Անգլիայի հավաքականի ավագ Սթիվեն Ջերարդը: Ընդամենը 4-րդ րոպեին Ջերարդը ներխուժեց տուգանային հրապարակ եւ մոտ տասը մետրից գրավեց Հովարդի դարպասը:
Իսկ այն, ինչ տեղի ունեցավ 40-րդ րոպեին` անգլիացիները պետք է շատ արագ մոռանան, այլապես հետագայում ոչինչ չի ստացվի: Քլինթ Դեմփսիի մոտ 20 մետրից կատարած հարվածից հետո Անգլիայի նորեկ դարպասապահ Ռոբերտ Գրինն անսպասելի բաց թողեց գնդակը ձեռքից եւ «Ջաբուլանին» հանգիստ գլորվելով հայտնվեց Անգլիայի հավաքականի դարպասում: Ֆաբիո Կապելոն եւ Դեւիդ Բեքհեմն այդ պահին դժբախտ տեսք ունեին:
Շատ թույլ խաղաց Անգլիայի հավաքականի հարձակման առաջատար Ուեյն Ռունին, որը վերջում որոշակի ակտիվություն դրսեւորեց, սակայն ոչինչով աչքի չընկավ:
Անգլիան ու ԱՄՆ-ը նախկինում ընդամենը մեկ պաշտոնական հանդիպում էին անցկացրել. 1950թ. Բրազիլիայում կայացած աշխարհի առաջնության պատմական հանդիպումը, որն ավարտվել է ամերիկացիների 1:0 հաղթանակով: Դրանից հետո Անգլիան ամերիկացիներին հաղթել է 6:3, 8:1, 10:0 եւ 5:0 հաշիվներով, սակայն դրանք բոլորը եղել են ընկերական խաղերում: Ութ ոչ պաշտոնական հանդիպումներում Անգլիան հաղթել է 7, պարտվել մեկ անգամ:
Մինչ այսօր ոչ-ոքի այս թիմերի միջեւ չէր գրանցվել:
