նախընտրելի դարձնելԲելգիայի Վալոնիայի եւ Ֆլանդրիայի արհմիությունների կողմից կազմակերպվել է «հովհարային» հերթական բողոքի ցույցը՝ ընդդեմ տնտեսման կոշտ քաղաքականության: Զանգվածային երկրորդ գործադուլին մասնակցում են պետական եւ մասնավոր հատվածի աշխատողները՝ Նամյուր, Լիեժ, Լյուքսեմբուրգ, Արեւմտյան եւ Արեւելյան Ֆլանդրիա նահանգներում:
Այս նահանգներում գրեթե ամբողջությամբ դադարեցվել է երկաթուղային եւ հասարաական տրանսպորտի երթեւեկությունը, փոխանցում է ՏԱՍՍ-ը:
Առաջին «հովհարային» բողոքի ցույցը տեղի էր ունեցել նոյեմբերի 24-ին՝ Էնո, Լյուքսեմբուրգ, Լիմբուրգ նահանգներում: Գործադուլային շարժման եզրափակիչ մասը կդառնա դեկտեմբերի 8-ի բողոքի ցույցը՝ Բրյուսելում եւ Վալոնիայի եւ Ֆլամանդիայի Բրաբանտ նահանգներում, որը տեղի է ունենալու երկուշաբթի օրը:
Բելգիայի արհմիությունները մտադիր են լայնամասշտաբ բողոքի ցույցեր անցկացնել այնքան ժամանակ, քանի դեռ իշխանությունները հաշվի չեն առնում աշխատավորների պահանջները:
«Հովհարային» բողոքի ցույցերին կհաջորդի արհմիությունների համընդհանուր ցույցը՝ դեկտեմբերի 15-ին:
Բելգիայի աշխատավորները դժգոհ են, որ նոր իշխանությունների կողմից բյուջետային ծախսերը կրճատելու եւ հարկային քաղաքականությունը շտկելու հետեւանքով կնվազի գնողունակությունը թագավորության տնտեսապես ակտիվ բնակչության երկու երրորդի շրջանում: Ցույցի մասնակիցները դեմ են նաեւ հարկային ծանրաբեռնվածության եւ կենսաթոշակային տարիքի շեմը բարձրացնելուն:
