Հայաստանի քննչական կոմիտեի Լոռու մարզային քննչական վարչությունում ավարտվել է բնակչուհի Անիի կողմից Լոռու մարզի 3 բնակչի դիմանկարներով պոռնկագրական բնույթի նյութեր պատրաստելու եւ տարածելու, անձնական արժանապատվությունը պարբերաբար նսեմացնելու ճանապարհով նրանցից մեկին անզգուշությամբ ինքնասպանության փորձի հասցնելու դեպքերի առթիվ հարուցված քրեական գործի նախաքննությունը:

Մինչդատական վարույթում ձեռք բերված ապացույցներով պարզվել եւ հիմնավորվել է, որ Անին 2013 թվականի փետրվարից հունիս ամիսն ընկած ժամանակահատվածում ամուսնության նպատակով մտերիմ հարաբերություն է ունեցել Արամի հետ, ինչը հետագայում խզվել է։

Տեղեկանալով, որ վերջինս ցանկանում է ամուսնանալ մեկ այլ աղջկա հետ՝ վրեժխնդիր լինելու դրդապատճառով, Անին իր տանը, համակարգչում ֆոտոշոփ ծրագրի միջոցով, 2013 թվականի հուլիսին պոռնկագրական բնույթի նյութեր է պատրաստել այդ աղջկա դիմանկարով։

Այնուհետեւ դրանք տարածել է «odnoklassniki» եւ «Вконтакте» սոցիալական ցանցերում՝ նրա անունով իր կողմից բացված էջերի միջոցով։

Չդիմանալով նվաստացումներին՝ աղջիկը 2013 թվականի նոյեմբերի 10-ին՝ ժամը 19:30-ի սահմաններում, փորձել է ինքնասպան լինել՝ իրենց բնակարանի պատուհանից նետվելու միջոցով, ինչը նկատել է եւ կանխել եղբայրը:

Քննությամբ պարզվել է, որ Անին 2014 թվականի գարնանն ամուսնության նպատակով մտերիմ հարաբերություններ է ունեցել Արտյոմի հետ։ Վերջինիս հետ հարաբերությունները խզելուց հետո Անին տեղեկացել է, որ նա ցանկանում է ամուսնանալ մեկ այլ աղջկա՝ Նարինեի հետ։

Վրեժխնդիր լինելու նպատակով 2014 թվականի մայիսին ֆոտոշոփի ծրագրի միջոցով Նարինեի եւ նրա եղբոր դիմանկարներով Անին պատրաստել է պոռնկագրական բնույթի նյութ, ինչը տարածել է «odnoklassniki» սոցիալական ցանցում՝ Նարինեի անվամբ իր կողմից բացված էջի միջոցով։

Ձեռք բերված ապացույցների համակցությամբ՝ Անիին մեղադրանք է առաջադրվել ՀՀ քրեական օրենսգրքի 263-րդ հոդվածի 1-ին մասով, 110-րդ հոդվածի 1-ին մասով եւ 263-րդ հոդվածի 1-ին մասով:

2015 թվականի փետրվարի 6-ին քրեական գործը մեղադրական եզրակացությամբ ուղարկվել է նախաքննության օրինականության նկատմամբ հսկողություն իրականացնող դատախազին: Մեղադրական եզրակացությունը հաստատվել է, եւ գործն ուղարկվել է դատարան։