նախընտրելի դարձնել
ԱԺ ՀՀԿ խմբակցության ղեկավար Վահրամ Բաղդասարյանը համոզված է, որ Աբովյանում քաղաքապետի ընտրություններն անցել են առանց որեւէ խախտման:
Այսօր՝ հունիսի 8-ին, լրագրողների հետ զրույցում Վահրամ Բաղդասարյանը նշեց, որ ընտրությամբ ժողովուրդն իր ազատ կամքն է արտահայտել:
«Ես չգիտեմ՝ ԲՀԿ-ի կողմից ով է սատարվել, գիտեմ, որ հաղթել է ՀՀԿ-ի կողմից սատարվող թեկնածուն: Ընտրություններն անցել են նորմալ մթնոլորտում»,- ասաց Վահրամ Բաղդասարյանը:
Նշենք, որ նախորդ օրը կայացած՝ Աբովյանի քաղաքապետի ընտրություններում հաղթել էր Ծառուկյանի օգնական Վահագն Գեւորգյանը:
Նշենք, որ Աբովյանում քաղաքապետի աթոռը թափուր էր մնացել Գագիկ Ծառուկյանի փեսայի՝ Կարո Գուլոյանի մարզպետ նշանակվելուց հետո։ Առաջադրվել էին Ծառուկյանի օգնական եւ նրա հովանավորյալ հայտնի Վահագն Գեւորգյանը, որին սատարում էր նաեւ ՀՀԿ-ն: Ինքնառաջադրված Էդվին Թադեւոսյանը Ծառուկյանի մորաքրոջ որդին է:
Առաջադրվել էին նաեւ «Քինգ դելյուքսի» սեփականատերը՝ «Պալաչ» մականունով Արթուր Գեղամի Հարությունյանը, ու եւս մեկ Արթուր Գեղամի Հարությունյան, որը կապ չունի Աբովյան քաղաքի հետ եւ առաջադրվել էր «Պալաչին» խանգարելու համար:
Ընտրություններին մասնակցելու համար ինքնառաջադրվել էր նաեւ անկուսակցական, Աբովյանի նախկին քաղաքապետ Կարապետ Իսրայելյանը:
