նախընտրելի դարձնել
ՀՀ արդարադատության նախարարության «Նուբարաշեն» քրեակատարողական հիմնարկում պատիժը կրող դատապարտյալ Հովհաննես Չ.-ն հաղորդում է տվել այն մասին, որ 2013 թվականի հունվարի 4-ին՝ գիշերային ժամի, ՀՀ ԱՆ «Սեւան» քրեակատարողական հիմնարկի հարակից տարածքում գտնվելու ժամանակ իրեն են մոտեցել հիմնարկի մի քանի աշխատակիցներ, ձեռքերով եւ ոտքերով հարվածներ հասցնելով մարմնի տարբեր մասերին, ստիպողաբար մտցրել են հիմնարկ:
ՀՀ Քննչական կոմիտեից հայտնում են, որ քրեակատարողական հիմնարկում հատուկ ծառայություն իրականացնող աշխատակիցները շարունակել են իր նկատմամբ կիրառել բռնություն՝ պահանջելով խոստովանել, իբր, ինքը քիչ առաջ թմրամիջոց է արտանետել հիմնարկի տարածք: Դրանից հետո հիշյալ քրեակատարողական հիմնարկի հետաքննիչը առանց ընթերակաների ներկայության կազմել է իրեն խուզարկության ենթարկելու վերաբերյալ կեղծ արձանագրություն եւ արձանագրել, թե, իբր, գրպանից հայտնաբերվել է այն ծխախոտի տուփը, որի փայլաթիթեղով փաթեթավորված է եղել արտանետված թմրամիջոցը:
Դատապարտյալի հաղորդման հիման վրա ՀՀ ԱՆ «Սեւան» քրեակատարողական հիմնարկի հատուկ ծառայություն իրականացնող անձանց կողմից բռնության գործադրմամբ զուգորդված պաշտոնեական լիազորություններն անցնելու եւ պաշտոնեական կեղծիք կատարելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 309-րդ հոդվածի 2-րդ մասով եւ 314-րդ հոդվածի 1-ին մասով հարուցվել է քրեական գործ:
Կատարվում է նախաքննություն:
