Նախընտրելի
ՀՀ արդարադատության նախարար Հովհաննես Մանուկյանը հունիսի 19-ին ընդունել է Հայաստանում Գերմանիայի դեսպան Ռայներ Մորելին, ով ավարտում է իր դիվանագիտական առաքելությունը Հայաստանում:
Կողմերը զրուցել են դեսպանավարման շրջանում արդյունավետ համագործակցության, ինչպես նաեւ հետագայում շարունակվելիք ծրագրերի մասին:
Նախարարը շնորհակալություն է հայտնել դեսպանին եւ Գերմանիայի կառավարությանը ձեւավորված ամուր համագործակցության համար` այս համատեքստում առանձնացնելով Գերմանիայի միջազգային համագործակցության ընկերության (GIZ) հետ փոխգործակցության լայն շրջանակը:
Դեսպանն իր գոհունակությունն է հայտնել Արդարադատության նախարարության եւ, ընդհանրապես, գործադիր իշխանության հետ արդյունավետ համագործակցության համար՝ ընդգծելով երկկողմ համագործակցության մեջ արդարադատության ոլորտի էական նշանակությունը:
Ռայներ Մորելը կարեւորել է, որ թոշակի անցնելուց առաջ վերջին տարիներին պաշտոնավարել է Հայաստանում, եւ ի դեմս իրեն ու իր տիկնոջ՝ Հայաստանի երկրպագուներն ավելացել են երկուսով:
Հրաժեշտի հանդիպման ավարտին նախարար Հովհաննես Մանուկյանը, եւս մեկ անգամ կարեւորելով Ռայներ Մորելի պաշտոնավարման տարիներին իրականացված աշխատանքը, նրան մաղթել է հաջողություններ հետագա բոլոր ձեռնարկումներում:
