Այսօր` հուլիսի 22-ին, Համահայկական խաղերի համաշխարհային կոմիտեի նախագահ Իշխան Զաքարյանի գլխավորությամբ տեղի է ունեցել ընդլայնված կազմով խորհրդակցություն, որին մասնակցել են Համահայկական խաղերի անցկացման կառավարական կազմկոմիտեի, ՀԽՀԿ գործկոմի անդամներ, աշխատակազմի ներկայացուցիչներ: Հանդիպման ընթացքում քննարկվել են Համահայկական ամառային 6-րդ խաղերի կազմակերպմանն ու անցկացմանն առնչվող հարցեր:

Իշխան Զաքարյանը հանձնարարել է պատշաճ կերպով դիմավորել եւ ճանապարհել արտերկրից ժամանող պատվիրակություններին, ինչին պետք է աջակցեն նաեւ Քաղավիացիայի գլխավոր վարչության պատասխանատուները: Գլխավոր վարչության պետ Արտյոմ Մովսեսյանը, մատնանշելով նախորդ խաղերի անցկացման արդյունքում ձեռք բերված փորձը, ասաց, որ ունեն արդեն իսկ գործնականում իրենց արդյունավետությունն ապացուցած աշխատանքային մեխանիզմներ:

Պարոն Զաքարյանը շեշտել է, որ ամենակարեւոր եւ ամենաբարդ խնդիրներից մեկը տրանսպորտային միջոցների անհրաժեշտ քանակության ապահովումն է, որի շուրջ արդեն իսկ կան որոշակի պայմանավորվածություններ Երեւանի քաղաքապետ Տարոն Մարգարյանի հետ:

Բոլոր այն քաղաքները, որտեղ անց են կացվելու Համահայկական ամառային 6-րդ խաղերը, մայրաքաղաք Երեւանի գլխավորությամբ, պետք է բերվեն տոնական տեսքի եւ զարդարվեն համապատասխան խորհրդանշաններով: Երեւանի քաղաքապետ Տարոն Մարգարյանը նշել է, որ քաղաքապետարանում իր գլխավորությամբ ստեղծվել է աշխատանքային խումբ, որը պատրաստ է լուծել վերոհիշյալ խնդիրները:

Տարածքային կառավարման եւ արտակարգ իրավիճակների նախարար Արմեն Երիցյանը, անդրադառնալով նախարարության պատասխանատվության ոլորտում գտնվող հարցերին, հայտնել է, որ արդեն իսկ իր կողմից տրված են համապատասխան հանձնարարականներ:

Խորհրդակցության ընթացքում քննարկվել են նաեւ առողջապահական միասնական շտաբ կազմավորելու եւ խաղերի անցկացման վայրերում առաջին շտապբուժօգնության խմբի ձեւավորման հարցերը, որում պետք է ընդգրկված լինեն նաեւ վնասվածքաբան եւ սննդի մասնագետ: Առողջապահության նախարար Արմեն Մուրադյանը հավաստիացրել է, որ ձեռք են առնելու բոլոր անհրաժեշտ միջոցները` խաղերի մասնակիցների եւ հյուրերի առողջապահական անվտանգության ապահովման համար:

ՀՀ ոստիկանությունն ու ԱԱԾ-ն բավականին բարդ ու կարեւոր խնդիրներ ունեն լուծելու խաղերի մասնակիցների եւ հյուրերի կարգապահության, անվտանգության, պատշաճ կարգուկանոնի ապահովման առումով` հաշվի առնելով խաղերի մասնակիցների աննախադեպ թիվը, եւ հատկապես խաղերի մասնակիցների համար ազատ օր հայտարարված օգոստոսի 8-ին ուժեղացված ծառայություն իրականացնելը:  

Պարոն Զաքարյանը ներկայացրել է նաեւ տվյալ պահին առկա հիմնական մյուս խնդիրները, դրանց լուծման հնարավոր տարբերակները եւ համապատասխան հանձնարարականներ տվել ոլորտների պատասխանատուներին: