Քեմբրիջի համալսարանի գիտնականները ցավի մակարդակը վերահսկելու միջոց են գտել, հաղորդում է   novostiua.net-ը։

Նրանց հայտնագործությունը վկայում է այն մասին, որ իրականում գոյություն ունի նյարդային բջիջների եւ ցավի զգացման համար պատասխանատու գեն։ Այդ մասին ասվում է համալսարանի կայքում։  Հետազոտողներն այն եզրակացության են հանգել, որ կան մարդիկ, ովքեր հազվագյուտ անոմալիա ունեն՝ ցավի հանդեպ անզգայականություն։ Դա միլիոնից մեկի մոտ է հանդիպում եւ զարգանում է սաղմնային փուլում։ 

Հետազոտության ընթացքում հայտնաբերվել է  PRDM12 գենի երկու տարբերակ, որոնք հենց պատճառ են դառնում անոմալիայի համար։  Պարզվել է նաեւ, որ մարդը ցավի հանդեպ անզգայունակ կլինի այն դեպքում միայն, եթե երկու ծնողից էլ ժառանգի տվյալ գենի մի  տարբերակ։ 

Արժե նշել, որ ցավ զգալու կարողությունը շատ կարեւոր է կենդանի օրգանիզմի համար։ Իսկ եթե ճանաչվեն եւ ըմբռնվեն այն գործընթացները, որոնք ընկած են ցավի զգացողության հիմքում, դա շատ կօգնի վերահսկել ցավը։ Այս հայտնագործության շատ կարեւոր կողմերից է այն, որ այս գենի հայտնաբերումը հնարավորություն կտա նոր սերնդի ցավազրկող դեղմիջոցներ մշակել։