նախընտրելի դարձնել
2015 թվականի օգոստոսի 1-ին ՀՀ կառավարությունը, Հայաստանի արհմիությունների կոնֆեդերացիան եւ Հայաստանի գործատուների հանրապետական միությունը՝ ՀՀ աշխատանքային օրենսգրքի համաձայն, ստորագրել են Հանրապետական կոլեկտիվ պայմանագիր, որով սահմանվում են սոցիալ-աշխատանքային հարաբերությունների կարգավորման լրացուցիչ երաշխիքներ եւ Կողմերի համատեղ գործողությունները դրանց իրականացման համար:
Պայմանագիրը ստորագրել են ՀՀ վարչապետ Հովիկ Աբրահամյանը, Հայաստանի արհմիությունների կոնֆեդերացիայի նախագահ Էդուարդ Թումասյանը եւ Հայաստանի գործատուների հանրապետական միության նախագահ Գագիկ Մակարյանը:
Կոլեկտիվ պայմանագիրը կնպաստի սոցիալ-աշխատանքային հարաբերությունների կայուն զարգացմանը` ուղղված երկրում զբաղվածության արդյունավետ ապահովմանը, արժանապատիվ աշխատանքի խրախուսմանը, սոցիալական գործընկերության եւ համերաշխության կայացմանն ու զարգացմանը:
Պայմանագիրը միտված է նաեւ աշխատանքի եւ սոցիալական պաշտպանության ոլորտներում քաղաքականության մշակման եւ իրականացման գործընթացներում սոցիալական գործընկերների հնարավորինս լայն մասնակցության ապահովմանը, ինչպես նաեւ գործատուների եւ արհմիությունների ինստիտուցիոնալ եւ գործառնական կարողությունների զարգացմանը:
Պայմանագրային պարտավորությունների կատարման ապահովման նպատակով, նախատեսվում է ձեւավորել եռակողմ հանձնաժողով` կողմերի ներկայացուցիչների հավասար թվաքանակով:
Հանրապետական կոլեկտիվ պայմանագիրը կգործի երեք տարի ժամկետով:
