Մոսկվայի Շերեմետեւո օդանավակայանում արտահերթ վայրէջք է կատարել Տոկիոյից Փարիզ   ուղեւորվող  օդանավը: Վայրէջքի պատճառն այն է եղել, որ  օդանավի ուղեւորներից մեկը՝ մի ֆրանսուհի,  իրեն վատ է զգացել: Այս մասին հայտնել է  արտակարգ ծառայությունների աղբյուրը:

Air France ընկերության Բոյինգ 777 –ի անձնակազմի ղեկավարը Շերեմետեւոյից թույլատվություն է խնդրել հարկադիր վայրէջքի համար, քանի որ ուղեւորուհու  ինքնազգացողությունը կտրուկ վատացել էր:

«Տոկիո-Փարիզ չվերթի ժամանակ 33 ամյա ֆրանսուհու ինքնազգացողությունը վատացել է: Անձնակազմը ստիպված է եղել ընդմիջել չվերթը ու հարկադիր վայրէջք կատարել Շերեմետեւոյում: Սակայն երիտասարդ կնոջը փրկել չի հաջողվել: Նա մահացել է»,- հայտնում է արտակարգ իրավիճակների ծառայությունների  աղբյուրը:

Ինչպես հայտնում է Ինտերֆաքսը, երբ բժիշկները բարձրացել են օդանավ, կինն արդեն կենդանության նշաններ ցույց չի տվել: