նախընտրելի դարձնելԹուրքիան նախկինի պես «անաչառ, թափանցիկ եւ կանոնավոր» կիրառելու է Մոնտրյոյի կոնվենցիան, որը կարգավորում է սեւծովյան նեղուցներով նավագնացությունը։ Այս մասին ՏԱՍՍ-ի հետ զրույցում ասել է Թուրքիայի արտգործնախարար Մեվլութ Չավուշօղլուն։
«Թուրքիան, ինչպես նախկինում, այնպես էլ հետայսու շարունակելու է անաչառ, թափանցիկ եւ կանոնավոր կիրառել Մոնտրյոյի կոնվենցիան։ Մենք կարեւոր ենք համարում, որ բոլոր շահագրգիռ կողմերը զերծ մնան Մոնտրյոյի գործող ռեժիմն իրենց շահերի համար օգտագործելուց կամ կոնվենցիայի հիմքերը սասանելուց»,- նշել է Թուրքիայի արտգործնախարարը։
Նա մեկնաբանել է մամուլում հայտնված հրապարակումներն այն մասին, որ Թուրքիան պատրաստվում է պատժամիջոցներ կիրառել նեղուցների նկատմամբ եւ պլանավորում է ստուգել այդ նեղուցներով անցնող նավերը։
Նեղուցների կարգավիճակի մասին Մոնտրյոյի կոնվենցիան ստորագրվել է 1936թ. Շվեյցարիայում եւ կարգավորում է Բոսֆորի, Դարդանելի նեղուցներով եւ Մարմարի ծովով նավագնացությունը։ Այն խաղաղ պայմաններում արգելում է ոչ սեւծովյան պետությունների կամ ոչ ափամերձ երկրների ռազմանավերի նավարկությունը նեղուցներով։
Կոնվենցիայի հսկումն իրականացում է Թուրքիան։ Եթե վերջինս պատերազմական իրավիճակում կամ պատերազմի սպառնալիքի տակ հայտնվի, ապա կարող է թույլատրել կամ արգելել նեղուցներով ցանկացած երկրի ռազմանավերի նավագնացությունը։
