Թաիլանդում վայրի բնության պահպանության մասնագետները Կանչանաբուրիի նահանգում գտնվող բուդդայական հայտնի մենաստանից հանել են բոլոր վագրերին այն բանից հետո, երբ կուսակրոններին մեղադրել են կենդանիների նկատմամբ դաժան վերաբերմունքի եւ դրանց անօրինական առեւտրի համար: 

Ընդհանուր առմամբ տարբեր արգելոցներ է տեղափոխվել 137 վագր, հայտնում է  BBC-ի ռուսական ծառայությունը:  

Վագրերի տեղափոխման գործողությունից մեկ օր անց վանական համալիրի ներսում սառնարաններից մեկում վագրի 40 մեռած ձագերի մնացորդներ են հայտնաբերել: 

Թաիլանդի ազգային պարկերի դեպարտամենտի պետի տեղակալ Ադիսորն Նիչդամրոնգը հայտնել է, որ առայժմ հայտնի չէ, թե ինչ նպատակով է կենդանիների խումբը տաճարում պահվել սառեցված վիճակում: 

Քննիչները ենթադրում են, թե կուսակրոնները կենդանիների մորթու եւ տարբեր մասերի առեւտրով են զբաղվել: Իրենք` կուսակրոնները սկսել են մենաստանում վագր պահել մոտ   20 տարի առաջ եւ հերքում են դաժան վերաբերմունքի մեղադրանքները: 

Երկու օր առաջ Թաիլանդի ոստիկանությունը երեք տղամարդու էր ձերբակալել, այդ թվում` մի կուսակրոնի, որոնք փորձել էին մենաստանից վագրի մորթիներ, ատամներ եւ մարմնի այլ մասեր դուրս բերել: Բացի այդ, նրանց մոտ  վագրի մորթով 700  փոքրիկ անոթ էին հայտնաբերել, որոնք Ասիայում համարվում են երջանկություն բերող թալիսման: 

Թաիլանդի ոստիկանությունն ավելի վաղ 22 մարդու, այդ թվում` երեք կուսակրոնի մաքսանենգության մեղադրանք է ներկայացրել: 

Կանչանաբուրիի նահանգում մենաստանը ժողովրդականություն է վայելում զբոսաշրջիկների շրջանում: Այցելուներին թույլատրվում է կերակրել կենդանիներին եւ գումարի դիմաց լուսանկարվել նրանց հետ: