Հեղեղման հետեւանքով տուժած արթիկցիների տներում մինչեւ հիմա ջուր է լցվում: Այս մասի NEWS.am-ին ասաց «Օգնենք արթիկցիներին վերացնելու հեղեղման հետեւանքները» նախաձեռնության անդամ Սոֆյա Հովսեփյանը, որը նախաձեռնության անդամների հետ այսօր՝ հուլիսի 2-ին, մեկնել է Արթիկ:

«Սարսափելի վիճակ է: Մարդկանց տներում մինչեւ հիմա ջուր է լցված: Տուն կա, որի  նկուղում է լցվում ջուրը մինչեւ հիմա: Քարերի տակ սատկած կենդանիներ են, տներ կան, որտեղ օձեր են հայտնվել»,- ասաց Սոֆյա Հովսեփյանը:

Նախաձեռնության անդամները օգնում են արթիկցիներին հեռացնել տների մոտ հավաքված ավազները, մաքրել նկուղներն ու հարակից տարածքները:

Հիշեցնենք, որ հունիսի 24-ին վարարել էր Ղարանղու գետը, խոշոր գլաքարերի կուտակումներ էին առաջացել Մովրովի եւ Բմբուլենց սելավատարերում, ինչի հետեւանքով ջրալցվել էին Արթիկի փողոցները:

Ջրալցվել էր նաեւ Արթիկի թիվ 2 մանկապարտեզը, որտեղից փրկարարները դուրս էին բերել 70 երեխայի եւ 27 աշխատակցի,  որոնց տեղափոխել էին անվտանգ տարածք, իսկ ջրալցված 13 շենք շինություններից՝ 60 բնակչի, որոնք տեղափոխվել էին հարազատների բնակարաններ:

Կառավարությունը որոշում է կայացրել տուժած քաղաքացիների փոխհատուցում տրամադրելու մասին: Արթիկցիները դժգոհ են փոխհատուցման չափից: