Նախընտրելի
Բրիտանական խորհրդարանի շենքում` Վեսթմինսթրյան պալատում կարող է «աղետալի իրադարձություն» տեղի ունենալ, ինչի հետեւանքով շինությունը իր նշանակությամբ ծառայելու համար լիովին անպիտան կդառնա: Այդ մասին է վկայում Պալատի վերանորոգման հարցերով միացյալ կոմիտեի հրապարակած զեկույցը, հայտնում է Curbed-ը:
Զեկույցում ասված է, որ խորհրդարանականները պետք է ազատեն պալատը, որպեսզի հնարավոր լինի այնտեղ շտապ վերանորոգում կատարել մոտ չորս մլրդ ֆունտ սթեռլինգ կամ 5,3 մլրդ դոլար արժողությամբ: Ակնկալվում է, որ պալատի վերանորոգումը վեց տարի կխլի: Հիմնական աշխատանքները կվերաբերեն շինության ինժեներական համակարգերին. դրանցից շատերը տեղադրվել են XX դարի կեսին եւ դրանց շահագործման ժամկետը սպառվել է դեռեւս 1970-80 թվականներին:
«Բոլոր մեխանիկական եւ էլեկտրական համակարգերի ամբողջական եւ անսպասելի խափանումը, որի հետեւանքով շենքում գտնվողները ստիպված կլինեն անհապաղ լքել այն, շատ ռեալ է», — նշված է զեկույցում:
Եթե «երկիրը չի ուզում բախվել այդ լեգենդար շինության կորստի անհրաժեշտությանը», պալատում վերանորոգման աշխատանքները պետք է սկսվեն անմիջապես, նշում են փաստաթղթի հեղինակները:
Վեստմինստրյան պալատի ժամանակակից շինությունը Լոնդոնում՝ Թեմզա գետի ափին, կառուցել են 1860 թվականին: Դրանում ընթանում են երկրի խորհրդարանի նիստերը: Պալատում ավելի քան հազար տարածք կա, մոտ 100 աստիճան եւ մի քանի կմ երկարությամբ միջանցքներ: Շենքի աշտարակներից մեկը` Բիգ Բենը Մեծ Բրիտանիայի խորհրդանիշն է: 1987 թվականին Վեսթմինսթրյան պալատը ներառվել է ՅՈՒՆԵՍԿՕ-ի համաշխարհային ժառանգության ցուցակում:
