նախընտրելի դարձնելԳերմանիայի զարգացման վարկերի (KfW) բանկի աջակցությամբ իրականացվող Հայաստան-Վրաստան էլեկտրահաղորդման օդային գծի եւ ենթակայանների կառուցման ծրագրի իրականացման կապալառու կազմակերպությունների ընտրության նպատակով հայտարարված միջազգային մրցույթի հայտատուները հայտնի կդառնան փետրվարի առաջին տասնօրյակում։
ՀՀ էներգետիկ ենթակառուցվածքների եւ բնական պաշարների նախարարությունից NEWS.am-ին հայտնում են, որ նախարարության զարգացման եւ ներդրումային ծրագրերի վարչության պետ Հայկ Հարությունյանի խոսքով, հայտերի ներկայացման վերջնաժամկետը բարձր լարման հաստատուն հոսանքի փոխակերպիչ կայանի եւ ենթակայանների կառուցման համար սահմանված է 2017թ. փետրվարի 6-ին, էլեկտրահաղորդման օդային գծերի կառուցման համար՝ փետրվարի 8-ին:
Ինչպես հայտնի է, ծրագրի իրականացման նպատակն է միացնել հայկական եւ վրացական էլեկտրաէներգետիկական համակարգերը` վրացական սահմանին մոտ` Այրումում տեղակայվող բարձր լարման հաստատուն հոսանքի փոխակերպիչ կայանով։ Վրացական կողմից միացումը կլինի «Մառնեուլի» ենթակայանից 500 կՎ օդային գծի միջոցով: Արդյունքում` Հայաստան-Վրաստան էլեկտրաէներգիայի փոխանակման հզորությունը ներկայիս 200 ՄՎտ-ից առաջին փուլում` 2019թ. կհասցվի 350 ՄՎտ-ի։
Առաջին փուլի իրականացման նպատակով ներգրավվել են շուրջ 188 մլն եվրոյի վարկային եւ դրամաշնորհային միջոցներ։
Ծրագիրը կշարունակվի նաեւ դրանից հետո։ Երկրորդ փուլի միջոցառումների իրականացման արդյունքում Հայաստան-Վրաստան գծով էլեկտրաէներգիայի փոխանակման հզորությունը 2021թ. կհասնի 700 ՄՎտ-ի, իսկ վերջնական փուլում` ելնելով շուկայի եւ տարածաշրջանային համագործակցության պահանջներից՝ 1050 ՄՎտ-ի:
Հայաստան-Վրաստան էլեկտրահաղորդման օդային գծի կառուցմամբ կխթանվի էներգետիկայի բնագավառում տարածաշրջանային հյուսիս-հարավ՝ Ռուսաստան-Վրաստան-Հայաստան-Իրան փոխշահավետ համագործակցության զարգացումը:
