նախընտրելի դարձնելԲրիտանացի գիտնական Դեւիդ Գրանտի՝ Daily Mail–ում լույս տեսած հոդվածը սոցցանցերում աղմուկ է բարձրացրել հայկական ձեռագրի լուսանկարի պատճառով, որը հոդվածում հայտնվել էր, առանց հայ աղբյուրների մասին հիշատակման։
Չնայած հոդվածում չի նշվում, թե ինչ լեզվով է տեքստը, որում գիտնականին հաջողվել է գտնել Ալեքսանդր Մակեդոնացու կտակը, պարբերականը լուսանկար է հրապարակել, որտեղ հստակ երեւում է, որ տեքստը հայերեն է: Հաղորդվում է, որ հատվածը վերցված է «Ալեքսանդր Մեծի պատմություից»: Պատկերից դատելով՝ դա ավելի շուտ 14-րդ դարին վերագրվող «Ալեքսանդր Մեծի պատմությունը» հայկական ձեռագիրն է, որը հիմքում դեռեւս 5-րդ դարում թարգմանված տեքստն է։
NEWS.am–ի հարցմանն ի պատասխան՝ գրքի հեղինակը նշեց, որ լուսանկարն ընտրել է Daily Mail–ի խմբագրությունը իր սեփական արխիվից, եւ այն իր գրքի նկարազարդումը չէ։ Հեղինակը նշեց, որ ինքն իր գրքում հիշատակել է «Ալեքսանդր Մեծի պատմության» հայկական շարադրման մասին, սակայն հպանցիկ, առանց այդ թեմային մանրամասն անդրադառնալու։
Նրա խոսքով՝ իր գրքում Հայաստանի մասին մի քանի հիշատակումներ կան, որոնցում նկարագրվում է Ալեքսանդրի կայսրության աշխարհագրությունը։ «Ինչ վերաբերում է մատենագրությանը, ապա այն 30 էջ է զբաղեցնում իմ գրքի վերջում»,– նշեց հեղինակը՝ պատասխանելով հարցին, թե օգտագործել է արդյոք նա հայկական աղբյուրներ։
Բրիտանացի գիտնական Դեւիդ Գրանտը հայտարարել է, որ վերջապես գտել է Ալեքսանդր Մակեդոնացու կտակը՝ նրա մահից ավելի քան 2000 տարի հետո: Գիտնականը պնդում է, որ Մակեդոնիայի մահացող թագավորի վերջին ցանկությունները գտել է հնագույն տեքստում, որն անհայտ էր հարյուրամյակներ շարունակ:
Իր՝ «Ալեքսանդր Մեծի կորած կտակի որոնումներում» գրքում Դեւիդ Գրանտը գրել է, որ կտակը թաքցվել է քաղաքական պատկերացումների պատճառով: Իսկական կտակը թաքցրել են նրա գեներալները, քանի որ կտակում Ալեքսանդրն իր ժառանգորդներ է հռչակել այդ ժամանակ դեռեւս չծնված որդուն՝ Ալեքսանդր IV-ին եւ ավագ որդուն՝ Հերակլեսին:
