նախընտրելի դարձնելԾննդկան Մերի Մարգարյանի եւ նորածնի մահվան գործով նշանակված դատաբժշկական հանձնաժողովային փորձաքննության հանձնաժողովի նախագահ, Հանրապետության գլխավոր գինեկոլոգ-մանկաբարձ Ռազմիկ Աբրահամյանը կարծես չի ցանկանում ներկայանալ դատարան ու ցուցմունք տալ:
Ռազմիկ Աբրահամյանը ծննդկանի ու նորածնի մահվան գործով պետք է ցուցմունք տար դեռ երեք ամիս առաջ, սակայն նա հրաժարվում է ներկայանալ դատարան: Ավելին, հունվարի 18-ին գլխավոր գինեկոլոգ-մանկաբարձը գրություն էր ուղարկել Շենգավիթ վարչական շրջանի ընդհանուր իրավասության դատարան եւ հայտնել, որ առողջական լուրջ խնդիրներ ունի եւ եթե հնարավոր է, ցուցմունք տա գրավոր: Դատարանն այնուամենայնիվ որոշում է կայացրել կրկին ծանուցում ուղարկել Ռազմիկ Աբրահամյանին: Դատական նիստը նշանակված է ապրիլի 25-ին: Եթե այս անգամ էր նա նիստին չներկայանա, հնարավոր է՝ բերման ենթարկելու որոշում կայացնի դատարանը:
Ավելի վաղ Քննչական կոմիտեն հաղորդել էր, որ «Շենգավիթ» ԲԿ-ի բժշկուհի Շուշանիկ Բախշյանը 2015 թվականի հուլիսի 23-ին հեռախոսակապի միջոցով տեղեկացել է, որ իր հսկողության տակ գտնվող հղի Մերի Մարգարյանն ունեցել է բարձր ջերմություն եւ վերջինիս խորհուրդ է տվել ընդունել «Պարացետամոլ» դեղահաբ։ 2015 թվականի հուլիսի 24-ին հղի կնոջը հրավիրել է բժշկական կենտրոն հերթական կոնսուլտացիայի համար եւ տեղյակ լինելով Մերի Մարգարյանի բարձր ջերմություն ունենալու մասին՝ չի հոսպիտալացրել նրան: 2015 թվականի հուլիսի 27-ին, երբ Մերի Մարգարյանը ստացիոնար բուժում է ստացել «Շենգավիթ» բժշկական կենտրոնում, առավոտյան ժամը 09.00-ից սկսած, արյան բիոքիմիական եւ մնացած հետազոտությունների արդյունքում արձանագրվել է արագ ընթացող եւ հղիության հետ կապված զարգացող փոփոխություններ, որի պայմաններում չի կատարվել կյանքի ցուցումով անհապաղ ծննդալուծում, այդ թվում նաեւ՝ կեսարյան հատման միջոցով, ինչի հետեւանքով առաջացած բազմաօրգանային անբավարարությունից 2015 թ. հուլիսի 29-ին Մերի Մարգարյանը մահացել է, իսկ հաջորդ օրը թոքերի եւ գլխուղեղի այտուցից մահացել է նաեւ նրա նորածին դուստրը:
Ծննդկանի եւ նորածին դստեր մահվան գործով երկու մեղադրյալ կա՝ «Շենգավիթ» ԲԿ-ի բժշկուհի, Մերի Մարգարյանի հղիությունը վարած Շուշանիկ Բախշյանը եւ հուլիսի 25-ի հերթապահ բժշկուհի Անի Բաբելյանը: Նրանց մեղադրանք է առաջադրվել Քրեական օրենսգրքի 130-րդ հոդվածի 2-րդ մասով: Բախշյանը գրավի դիմաց ազատ է արձակվել, իսկ Բաբելյանի նկատմամբ խափանման միջոց է ընտրվել ստորագրություն չհեռանալու մասին:
