ՎիվաՍել-ՄՏՍ ընկերությունը հյուրընկալել է աշխարհի մի շարք երկրներից ժամանած 20-ից 32 տարեկան հայ երիտասարդ կամավորների: Երիտասարդների հանդիպումը ՎիվաՍել-ՄՏՍ-ի գլխավոր տնօրեն Ռալֆ Յիրիկյանի հետ ավելի է ոգեւորել վերջիններիս՝ հայրենիքը եւ սեփական արմատները բացահայտելու ցանկությունը: Երկխոսության ընթացքում, Ռալֆ Յիրիկյանը կամավորներին ծանոթացրել է ՎիվաՍել-ՄՏՍ-ի կարեւոր ձեռքբերումներին:

Կամավորները ծանոթացել են նաեւ ընկերության հիմնարար արժեքներին, կորպորատիվ սոցիալական պատասխանատվության քաղաքականությանն ու խորհուրդներ ստացել բիզնեսի ճիշտ կառավարման գործիքների վերաբերյալ:

«Հաջողության հասնելու համար պետք է ունենալ հստակ տեսլական՝ նպատակների ու դրանց հասնելու քայլերի վերաբերյալ, լինել համբերատար, պատասխանատու եւ առաջնորդվել ձեւավորված արժեհամակարգով եւ թիմային աշխատանքով: Սա հատկանշական է ոչ միայն բիզնես ոլորտում, այլեւ՝ ցանկացած մասնագիտական ուղղվածության մեջ», - ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

Ֆրանսիայից, Արգենտինայից, Բրազիլիայից, ԱՄՆ-ից, Ռուսաստանից, Սիրիայից, Ավստրալիայից եւ Կանադայից ժամանած 20 երիտասարդ կամավորները կիսվել են իրենց տպավորություններով, ինչպես նաեւ ներկայացրել իրենց դիտարկումները՝ Հայաստանի տնտեսական եւ հասարակական հարաբերությունների վերաբերյալ եւ այլ հարցերի շուրջ: Հանդիպումն ուղեկցվել է հետաքրքիր հարց ու պատասխանով, քննարկումներով եւ ավարտվել շրջայցով՝ ընկերության գլխամասային գրասենյակով:

ՎիվաՍել-ՄՏՍ-ը ողջունում եւ բարձր է գնահատում երիտասարդ սփյուռքահայ կամավորների՝ հայրենիք ացելելու որոշումը եւ Հայաստանի տարբեր մարզերում կամավորական տարբեր նախագծերի մասնակցելու պատրաստակամությունը:

2004 թվականից ի վեր, ՎիվաՍել-ՄՏՍ-ի աջակցությամբ «Դեպի Հայք» հիմնադրամը կազմակերպել է ավելի քան 47 երկրից Հայաստան ժամանած 1400 հայ մասնագետների կամավոր աշխատանքը` Հայաստանի տարբեր մարզերում: