նախընտրելի դարձնելՀյուսիսային Կորեայի իշխանությունները խորհրդատվություններ անցկացնելու փորձեր են կատարում Հանրապետական կուսակցության հետ կապեր ուեցող վաշինգտոնյան վերլուծաբանների հետ, որպեսզի ավելի լավ հասկանան Փհենյանի վերաբերյալ ԱՄՆ նախագահ Դոնալդ Թրամփի հայտարարությունները եւ քաղաքականությունը, հայտնում է The Washington Post (WP) պարբերականը՝ վկայակոչելով իր աղբյուրներին:
Նրանց տեղեկացմամբ՝ Հյուսիսային Կորեայի պաշտոնատար անձինք սկսել են նման կարգի փորձեր ձեռնարկել դեռեւս մինչեւ 2 երկրների առաջնորդների ռազմական հռետորաբանության սաստկացումը: «Նրանց գլխավոր մտահոգությունը Թրամփն է: Իրենք չեն կարողանում նրան հասկանալ»,- ասել է պարբերականի աղբյուրը:
ՄԱԿ-ում Հյուսիսային Կորեայի ներկայացուցչությունը հրավիրել է երկիր այցելել ԱՄՆ ԿՀՎ-ի Կորեական թերակղզու հարցերով բաժնի պետի նախկին տեղակալ Բրյուս Քլինգներին, որը ներկայումս ամերիկյան «Ժառանգություն» (Heritage Foundation) հիմնադրամի Ասիայի հետազոտությունների կենտրոնում է աշխատում: WP-ի տեղեկություններով՝ Թրամփը սերտորեն կապված է հիմնադրամի հետ, որը ներգործել է ԱՄՆ նախագահի մի շարք որոշումների վրա, սակայն Քլինգներին ծանոթ չէ:
Փորձագետը հրաժարվել է Փհենյան գնալ, սակայն նշել է, որ Հյուսիսային Կորեան կրկին դիմել է ամերիկացի մասնագետներին եւ նախկին պաշտոնատար անձանց: «Նման հանդիպումներն օգտակար են, բայց եթե ռեժիմը ցանկանում է հստակ ազդանշան ուղարկել, պետք է դիմի անմիջապես ԱՄՆ կառավարությանը»,- վստահ է Քլինգները:
