նախընտրելի դարձնելԱռնվազն 29 մարդ է վիրավորվել, իսկ մեկը զոհվել «Էլեոնոր» ձմեռային փոթորկի հետեւանքով, որը հարվածել է Ֆրանսիայի տարածքին հունվարի 3-ի գիշերը: Այս տվյալները հաղորդում է ՏԱՍՍ-ը՝ վկայակոչելով BFM հեռուստալաիքը։
Հունվարի 3-ին հայտնել էին երկրի արեւմտյան, կենտրոնական ու արեւելյան շրջաններում բնության այս տարերքից 15 տուժածների մասին։
Հեռուստաալիքի տվյալներով՝ չորս մարդ լուրջ վնասվածքներ է ստացել: Հյուսիսային եւ արեւմտյան շրջաններում ուժեղ քամիների, անձրեւների եւ կայծակի հարվածների արդյունքում 35 հազարից ավելի տներ էլեկտրաէներգիա չեն ունեցել: Կորսիկայում առանց էլեկտրականության են մնացել մոտ 11,000 տնային տնտեսություն:
Օդերեւութաբանները զգուշացնում են, որ հունվարի 4-ին «Էլեոնոր»-ը շարունակելու է հարվածել մի քանի ֆրանսիական շրջաններին: Օրվա ընթացքում Ալպերում սպասվում են ձնաբուքեր, Վերին Սավոյայում, Սավոյայում եւ Վերին Ալպերում, օդերեւութաբանների կարծիքով, ձնահյուսերի մեծ վտանգ կա: Օրվա ընթացքում սպասվում է քամու ուժգնացում մինչեւ 50 մ/վրկ: Այս օրերին լեռնադահուկային սպորտի սիրահարներին խորհուրդ է տրվում նկատի ունենալ բոլոր անհրաժեշտ անվտանգության միջոցները, հետեւել եղանակային կանխատեսումներին եւ հաշվի առնել տեղական իշխանությունների առաջարկությունները:
Ձմեռային փոթորիկները պարբերական երեւույթներ են Ֆրանսիայում: Նրանք գալիս են ԱՄՆ-ի արեւելյան ափերից, արագորեն անցնում Ատլանտյան օվկիանոսը եւ հարվածում երկրի տարբեր շրջաններին: Այս տարի օդերեւութաբանները կարծում են, որ Ֆրանսիայում իրավիճակը աննախադեպ է՝ երեք շաբաթվա ընթացքում «Էլեոնորն» դարձել է չորրորդ փոթորիկը: Նախորդ փոթորիկը՝ «Կարմենը», ընդամենը մի քանի օր առաջ էր հարվածել։
