Ակնհայտ է, որ հայկական կողմը որոշակի դժգոհություն ունի Ադրբեջանին զենք մատակարարելու կապակցությամբ: Այս մասին մարտի 28-ին կայացած մամուլի ասուլիսի ժամանակ ասաց Հայաստանի Հանրապետության պաշտպանության նախարարի տեղակալ, ՊՆ պետական ռազմարդյունաբերական պետական կոմիտեի նախագահ Դավիթ Փախչանյանը:

Մեկնաբանելով ՌԴ Դաշնային ժողովի Պետական դումայի ԱՊՀ գործերով, եվրասիական ինտեգրման ու հայրենակիցների հետ կապերի կոմիտեի նախագահի առաջին տեղակալ Կոնստանտին Զատուլինի վերջերս Երեւանում արված հայտարարությունը Ադրբեջանին զենքի մատակարարման վերաբերյալ՝ ՀՀ փոխնախարարը նշեց, որ ռուսական կողմից կան հայտարարություններ այն մասին, որ Ադրբեժանին զենքի մատակարարումները կկրճատվեն:

Միեւնույն ժամանակ, փոխնախարարը նշեց, որ հայ-ռուսական ռազմական համագործակցությունը բավականին արդյունավետ է: Նրա խոսքով՝ առաջին վարկի շրջանակներում նախատեսվածն ամբողջությամբ իրականացվել է: Կա պայմանավորվածություն, որ աշխատանքը կշարունակվի: Սա հայկական կողմի մատակարարումների լուրջ մասն է, նշեց փոխնախարարը: