Ռուսաստանի Դաշնությունից հանրապետություն է ներկրկվել գարնանացան գարու սերմացուի հերթական խմբաքանակը: ՀՀ գյուղատնտեսությանն նախարարի տեղակալ Աշոտ Հարությունյանը նախօրեին այցելել է Արագածոտնի մարզ` ներկրման գործընթացին հետեւելու, սերմերի որակը դիտարկելու եւ բաշխման գործընթացին անձամբ հետեւելու նպատակով:

Հյուղնախարարությունից NEWS.am-ին հայտնում են, որ տեղեկացնելով, որ այս տարի մարզերից գարնանացան գարու պահանջարկը եղել է 2226 տոննա, որից 1200 տոննան արդեն բաշխվել է հողօգտագործողներին` փոխնախարարը հավելել է, որ հիմնականում սերմերը Հայաստան են ներկրվում Ռոստովի մարզի Զերնոգրադ քաղաքի «Դոնսկոյ ագրոխիմ» ընկերությունից եւ Ստավրոպոլի երկրամասի «Սեմենա Ստավրոպոլյա» ընկերությունից: 

Ընդգծելով, որ դեռեւս մոտ 20 օր հանրապետությունում կարելի է կատարել ինտենսիվ գարնանացանի աշխատանքներ եւ այդ ժամանակահատվածում նախատեսվում է բաշխել սերմացուի մնացած խմբաքանակը` նախարարի տեղակալը հորդորել է հողօգտագործողներին եւ համայնքների ղեկավարներին սեղմ ժամկետում ներկայացնել իրենց պահանջարկի վերաբերյալ հայտերը եւ ստանալ անհրաժեշտ սերմացուները:

Արագածոտնի մարզպետարանի աշխատակազմի գյուղատնտեսության եւ բնապահպանության վարչության պետ Յուրա Ազատյանը նշել է, որ գարնանացան գարու սերմացուի մարզի ընդհանուր պահանջարկը կազմել է 400 տոննա, այս պահի դրությամբ մարզին արդեն տրամադրվել է 290 տոննա սերմացու, մնացած խմբաքանակը կներկրվի առաջիկայում: Նա նաեւ շեշտել է, որ սերմերի ներկրումն իրականացվել է ճիշտ ժամանակին:

Նրա խոսքով` մարզում հացահատիկային մշակաբույսերի ցանքատարածությունները նախորդ տարվա ընթացքում կազմել են 19,5 հազար հեկտար: Ակնկալվում է, որ  գարնանացանի շնորհիվ այս տարի ցանքատարածություններ կավելանան 2,5-3 հազար հեկտարով:

Ապարան համայնքի Ափնագյուղի վարչական ղեկավար Ռոբերտ Կարապետյանը նշել է, որ ներկրված գարնանացան գարու սերմացուն աչքի է ընկնում խոշոր հատիկներով եւ մաքրությամբ, ինչը վկայում է բարձր որակի մասին: Կարապետյանը նաեւ կարեւորել է փաստը, որ սերմացուն ախտահանված է: